საზოგადოება
ღარიბაშვილი პანკისის მოსახლეობას შეხვდა
საქართველო, 11 დეკემბერი, საქინფორმი. შინაგან საქმეთა მინისტრი ირაკლი ღარიბაშვილი პანკისის ხეობაში, სოფელ დუისში, ადგილობრივ მოსახლეობას შეხვდა.შეხვედრის მთავარი თემა ლაფანყურის ინციდენტის გამოძიება იყო. ადგილობრივებმა ირაკლი ღარიბაშვილს მომხდარის შესახებ საკუთარი ვერსიები დეტალურად გააცნეს. შინაგან საქმეთა მინისტრმა მოსახლეობას პირობა მისცა, რომ აღნიშნული საქმის გამოძიება ობიექტურად წარიმართება და მას პირადად გააკონტროლებს. მოსახლეობასთან გასაუბრების შემდეგ მინისტრმა სოფლის მეჩეთი მოინახულა და იმამს საჩუქრად ყურანი და ხალიჩა გადასცა.
„ჩვენ ვართ ძმები, ჩვენ ვართ მეგობრები და არავის მივცემთ უფლებას, ჩვენ შორის რაიმე უთანხმოება ჩამოვარდეს, ეს არის დაუშვებელი. ამას მე გპირდებით, როგორც შინაგან საქმეთა მინისტრი. ეს არის ბატონ ბიძინა ივანიშვილის პოლიტიკა, ჩვენ უნდა ვიცხოვროთ როგორც ძმებმა, ჩვენ უნდა ვიყოთ ერთი ოჯახი“, – აღნიშნა ღარიბაშვილმა ლაფანყურის სპეცოპერაციის დროს დაღუპულთა ახლობლებთან საუბრისას.
„მე ვიქნები გარანტი, რომ თქვენზე ვერავინ განახორციელებს ზეწოლას. ჩემი თხოვნაა, დაიცავით კანონი, როგორც წესრიგის მოყვარულმა ხალხმა“, – აღნიშნა ირაკლი ღარიბაშვილმა. იგი სოფლის ღვთისმშობლის სახელობის ეკლესიასაც ეწვია.საქინფორმის მკითხველს შევახსენებთ, რომ შინაგან საქმეთა მინისტრი რეგიონების მონახულებას მომავალი 2 კვირის განმავლობაში გააგრძელებს.
