საქართველო, 10 დეკემბერი, საქინფორმი. გუშინ, 9 დეკემბერს, რფ-ის საგარეო საქმეთა მინისტრმა სერგეი ლავროვმა კრემლის ადმინისტრაციის წარმომადგენლებთან „მრგვალი მაგიდის“ მიმდინარეობისას განიხილა აქტუალური საგარეო პოლიტიკური საკითხები, რომელთაგან ერთ-ერთ საქართველოსთან ურთიერთობების ნორმალიზება იყო. რუსეთის პირველმა დიპლომატმა საქართველოსთან დიალოგის განახლების ჩარჩოებში ჯერ კიდევ 2006 წელს მოსკოვსა და თბილისს შორის ურთიერთობების გაუარესების ფონზე შეწყვეტილი მოსკოვი-თბილისის რეგულარული ავიარეისების აღდგენის სურვილი გამოთქვა და განაცხადა, რომ მოსკოვი მზადაა ამ საკითხის განსახილველად.

„ცოტამ თუ იცის, რომ უკვე რამდენიმე წელია, რაც ჩარტერული ავიამიმოსვლა აღვადგინეთ... ახლახან ჩარტერული რეისების რაოდენობა გაიზარდა. პრინციპში, მზად ვართ რეგულარული ავიამიმოსვლის აღდგენის განსახილველად, – აღნიშნა ლავროვმა და იქვე დასძინა, – რუსეთი მზადაა საქართველოდან სასოფლო-სამეურნეო პროდუქციის მოწოდების აღდგენისთვისაც“.

„როდესაც გვეუბნებიან, რომ საქართველოს ურთიერთობების გაუმჯობესება სურს, ჩვენ მზად ვართ, განვიხილოთ სასოფლო-სამეურნეო პროდუქციის მოწოდების საკითხიც... მზად ვართ, გონივრული ინიციატივებისა და იდეებისთვის, თუმცა, გვსურს, ვიცოდეთ, რა კონტექსტში გვთავაზობენ ურთიერთობების ნორმალიზებას“, – განაცხადა მან და დასძინა, რომ რფ-ისა და საქართველოს წარმომადგენელთა შეხვედრა უახლოეს ხანებში შედგება.