საქართველო, 7 დეკემბერი, საქინფორმი. მთავარი პროკურატურის მიერ სერგო თეთრაძის საქმეზე 5 დეკემბერს დაკავებული სასჯელაღსრულების დაწესებულების  სამართლებრივი რეჟიმის განყოფილების ყოფილი უფროსი, ინსპექტორი სერგო ბიწაძე სასამართლო სხდომის გუშინდელი გადაწყვეტილებით გირაოს სანაცვლოდ გაათავისუფლეს. ბიწაძეს ბრალად  სამსახურებრივი უფლებამოსილების გადამეტება ედება. დანაშაული გათვალისწინებულია საქართველოს სსკ-ის 333-ე მუხლის I ნაწილით.

მთავარი პროკურატურის განცხადების თანახმად, „გამოძიებით დადგინდა,  რომ 2011 წლის 20 სექტემბერს, დაახლოებით 19 საათსა და 30 წუთზე, გლდანის მე-8 დაწესებულების  სამართლებრივი რეჟიმის განყოფილების  უფროსმა ინსპექტორმა  სერგო ბიწაძემ, სასჯელაღსრულების დეპარტამენტის  გლდანის მე-8 დაწესებულების დირექტორ ალექსანდრე მუხაძესა და მასთან დაახლოებულ პირ რ. მ.-თან ერთად,  მუხაძის „TOYOTA „PRADO“-ს მარკის სამსახურებრივი  მანქანით, გლდანის მე-8 დაწესებულების ე.წ. შლუზიდან, სადაც ავტომანქანით შესვლის უფლება მხოლოდ საბადრაგო სამსახურის თანამშრომლებს აქვთ, საქართველოს სისხლის სამართლის საპროცესო კოდექსის 176-ე მუხლის მე-6 ნაწილისა და „პატიმრობის კოდექსის“ საქართველოს კანონის მე-9 მუხლის მოთხოვნათა უხეში უგულებელყოფით, გამოიყვანა ხელბორკილდადებული პატიმარი სერგო თეთრაძე და წაიყვანა დაუდგენელ ადგილას.

დაახლოებით 4-5 საათის შემდეგ იმავე  მანქანით სერგო  თეთრაძე დაწესებულებაში დააბრუნეს. მას აშკარად ეტყობოდა ფიზიკური ზემოქმედების კვალი, რითაც დაირღვა სერგო თეთრაძის კანონიერი ინტერესი.

აღნიშნული ქმედების გამო  5 დეკემბერს სერგო ბიწაძეს  ბრალი დაედო სამსახურებრივი უფლებამოსილების გადამეტებაში. დაუსწრებლად წაეყენა ბრალი ალექსანდრე მუხაძესაც, რომლიც  საქართველოში არ იმყოფება“.