საქართველო, 6 დეკემბერი, საქინფორმი. 2012 წლის წლიური ეროვნული პროგრამის შეფასებითი დოკუმენტი ნატოს კომისიამ ეროვნული პროგრამის განხილვის შემდეგ საქართველოს  გამოუგზავნა.

სახელმწიფო მინისტრმა ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილმა ნატოს ყოველწლიურ შეფასებით დოკუმენტზე ჟურნალისტებთან ისაუბრა. მისი თქმით, დოკუმენტში გარკვეული კრიტიკის გარდა, რომელიც შეეხება წინასაარჩევნო პერიოდში ოპოზიციის წარმომადგენლებზე ძალის გადამეტებისა და ზეწოლის შემთხვევებს, საუბარია დადებით მხარეებზე. ეს საკითხებია: საქართველოში მიმდინარე პროცესები, საპარლამენტო არჩევნები; ხაზგასმითაა აღნიშნული საქართველოს, როგორც არაწევრი ქვეყნის, ყველაზე დიდი კონტრიბუტორის, მონაწილეობა ავღანეთში ISAF-ის საერთაშორისო მისიაში გაწეულ წვლილზე; ჟენევის პროცესის მნიშვნელობაზე; რეფორმებზე, ძირითადად, თავდაცვის, სამართლებრივ სისტემებსა და მედიის  სფეროში; ასევე, რუსეთთან დიალოგის დაწყების აუცილებლობაზე.

დადებითად შეფასდა საქართველოს ძალისხმევა რუსეთთან ურთიერთობის ნორმალიზაციის მიმართულებით. ამ თვალსაზრისით, სახელმწიფო მინისტრის თქმით, პოზიტიურად არის შეფასებული საქართველოს პრემიერ-მინისტრის მიერ რუსეთში სპეციალური წარმომადგენლის, ზურაბ აბაშიძის, დანიშვნა ამ მოლაპარაკების პროცესში.

სახელმწიფო მინისტრის განცხადებით, ამ ეტაპზე უკვე მუშავდება ახალი ყოველწლიური პროგრამა,  რომელიც განსახილველად ნატოს კომისიას გადაეგზავნება.