სამართალი
შსს-მ კუდ-ის ყოფილი და მოქმედი მაღალჩინოსნები დააკავა
საქართველო, 6 დეკემბერი, საქინფორმი. შსს კუდ-ის ყოფილი და მოქმედი მაღალჩინოსნების დაკავების შესახებ განცხადებას ავრცელებს. მიმდინარე გამოძიების ფარგლებში დაკავებულ იქნა კონსტიტუციური უსაფრთხოების დეპარტამენტის აფხაზეთის ა/რ მთავარი სამმართველოს ყოფილი უფროსი რომან შუქურის ძე შამათავა, ამავე მთავარი სამმართველოს პირველი სამმართველოს უფროსი ტარიელ მიხეილის ძე ბარამია, მეორე სამმართველოს უფროსი სერგო ტარასის ძე უბილავა და ოპერატიული თანამშრომელი როინ კარლოს ძე აბშილავა. გამოძიება მიმდინარეობს საქართველოს სსკ-ის 143-ე მუხლის მე-3 ნაწილის „ა“ ქვეპუნქტით (წინასწარი შეთანხმებით, ჯგუფის მიერ თავისუფლების უკანონო აღკვეთა) და სსკ-ის 108-ე მუხლით (განზრახ მკვლელობა) გათვალისწინებული დანაშაულის ნიშნებით.
აღნიშნული დანაშაულის შეუტყობინებლობის ფაქტზე საქართველოს სსკ-ის 376-ე მუხლით გათვალისწინებული დანაშაულის ნიშნებით ბრალდებულად დაკავებული არიან შსს განსაკუთრებულ დავალებათა დეპარტამენტის სამეგრელო-ზემო სვანეთის სამხარეო სამმართველოს უფროსი ბახვა ჯემალის ძე ჩიქობავა და შსს კონსტიტუციური უსაფრთხოების დეპარტამენტის აფხაზეთის ა/რ მთავარი სამმართველოს ოპერატიული თანამშრომელი დავით ბორისის ძე ქორქია.
ამასთან, გამოძიება მიმდინარეობს სსკ 236-ე მუხლის პირველი ნაწილით, დიდი ოდენობით ცეცხლსასროლი იარაღის მართლსაწინააღმდეგო შეძენა-შენახვის ფაქტზეც, რომელშიც, გამოძიების მასალების მიხედვით, მხილებული არიან შსს კონსტიტუციური უსაფრთხოების დეპარტამენტის აფხაზეთის ა/რ მთავარი სამმართველოს ყოფილი უფროსი რომან შამათავა და მისივე თანამშრომელი დავით ქორქია.
