საზოგადოება
ზუგდიდსა და გალს პატარა ხიდი დააკავშირებს
საქართველო, 30 ნოემბერი, საქინფორმი. გაზეთ „რეზონანსის“ ინფორმაციით, დეკემბერში დასრულდება პატარა ხიდის მშენებლობა, რომელიც ზუგდიდსა და გალს ერთმანეთთან დააკავშირებს. საწყის ეტაპზე ახალ ხიდზე გადაადგილებას მხოლოდ ქვეითად მოსიარულეები შეძლებენ, თუმცა შემდგომში ის ტრანსპორტის მოძრაობასაც უზრუნველყოფს.
გალის რაიონის დანარჩენ საქართველოსთან დაკავშირება აფხაზეთის ლიდერ ალექსანდრე ანქვაბის წინასაარჩევნო დაპირება იყო. არჩევნებიდან ერთ წელიწადში გაირკვა, რომ გამშვებ პუნქტები 1-ლი იანვრიდან გაიხსნება და მათ მხოლოდ რუსები გააკონტროლებენ.
გალის რაიონის მოსახლეობა ზუგდიდში გადასვლას უპასპორტოდ და უფასოდ შეძლებს, ამისთვის მხოლოდ საცხოვრებელი ადგილის ცნობა დასჭირდება. თუმცა ტყვარჩელისა და გაგრის მცხოვრებნი საზღვარს აფხაზური პასპორტის გარეშე ვერ გადაკვეთენ და მათთვის ვიზის საფასური 5 ლარს შეადგენს.
