ივანიშვილი: „არ ვიმოქმედებთ იმის მიხედვით, თუ რა იწერება საზღვარგარეთ!"
საქართველო, 30 ნოემბერი, საქინფორმი. საქართველოს პრემიერ ბიძინა ივანიშვილის განცხადებით, საქართველოს მთავრობა არ იმოქმედებს იმ განცხადებების მიხედვით, რაც უცხოეთში კეთდება. ამის შესახებ მან განაცხადა „ვაშინგტონ პოსტის“ სტატიის კომენტირებისას, სადა მკვეთრად არის გაკრიტიკებული მოქმედი ხელისუფლების რევანშისტული პოლიტიკა.
„სააკაშვილი ცდილობს, არასწორი ინფორმაცია გაიტანოს საზღვარგარეთ. გიგა ბოკერიას სამსახურს ბიუჯეტიდან 16 000 000 ლარი აქვს დახარჯული, თუმცა ამ ინფორმაციის „გახსნა“ ვერ მოვახერხეთ, მას გრიფი „საიდუმლო“ ადევს. ჩვენ დიდი ეჭვი გვაქვს, რომ ეს პასკვილები ამ ფულით ფინანსდებოდა. ინფორმაცია გამოითხოვა ფინანსთა მინისტრმა, თუმცა მასაც არ აძლევენ. ვფიქრობ, რომ უახლოეს დღეებში შევძლებთ სიმართლის დადგენას.
ჩვენ არ ვიმოქმედებთ არცერთი განცხადების მიხედვით, რაც უცხოეთში კეთდება. ჩვენ ვართ საქართველოს მთავრობა და ძალიან კარგად ვფლობთ სიტუაციას საქართველოში. ქართველი საზოგადოება კარგად არის ინფორმირებული და ჩვენ კანონის თანახმად ვიმოქმედებთ. ასეთი სტატიები ვერ შეაჩერებს და ვერც შეაფერხებს სამართალდაცავი სტრუქტურების საქმიანობას. ჩვენ სამართლიანობისს აღდგენას ვიწყებთ. ეს პროცესები მალე დასრულდება და საერთაშორისო მედიას მათ რეალურ სახეს გავაცნობთ. ხალხის ფული ახლა ხალხს მოხმარდება და არა ამ ტიპის სტატიებს“, – განაცხადა პრემიერმა.
