სამართალი
თენგიზ გუნავა მთავარ პროკურატურაში კიდევ დაიბარეს
საქართველო, 29 ნოემბერი, საქინფორმი. შინაგან საქმეთა სამინისტროს გენერალური ინსპექციისა და სამეგრელო-ზემო სვანეთის სამხარეო პოლიციის უფროსი თენგიზ გუნავა მთავარი პროკურატურაში კიდევ ერთხელ დაიბარეს. ამჯერად მას არა პირად საჩივარზე, არამედ სხვა თემებთან დაკავშირებით მოუწევს გამომძიებლებთან ძირითად შეკითხვებზე პასუხის გაცემა. ჯერჯერობით უცნობია, რა საქმეზე დაიბარეს ის უწყებაში. როგორც თავად განაცხადა, არ არის გამორიცხული, კითხვები მის შინაგან საქმეთა სამინისტროში მუშაობის პერიოდს ეხებოდეს.
როგორც ადრე იუწყებოდა საქინფორმი, თენგიზ გუნავა რამდენიმე დღის წინ დააკავეს, შემდეგ კი გირაოს სანაცვლოდ გაათავისუფლეს. პირადი ჩხრეკისას მას იარაღი და ნარკოტიკული ნივთიერება აღმოუჩინეს. თუმცა, მისი განცხადებით, იარაღი და ნარკოტიკი მას ჩაუდეს, ამიტომ პროკურატურაში საჩივარი შეიტანა, რომლის საფუძველზეც გამოძიება დაიწყო.
„მითხრეს – ძველ საქმიანობასთან დაკავშირებით, ალბათ, ან სამეგრელოში მუშაობის პერიოდში, ან გენერალურ ინსპექციაში მუშაობის პერიოდში... ეცადნენ, პრაქტიკულად დავეკავებინე ნარკოტიკული საშუალების და იარაღის ჩადებით, ეს არ გამოუვიდათ. ალბათ, ეძებენ სხვა რაღაცებს. 5 საათზე ვარ დაბარებული და მივალ როგორც, მგონი, მოწმე, ჯერჯერობით“, – განაცხადა თენგიზ გუნავამ ჟურნალისტებთან საუბრისას პროკურატურაში შესვლამდე.
