საქართველო, 21 ნოემბერი, საქინფორმი. დღეს პარლამენტის ადამიანის უფლებათა დაცვისა და სამოქალაქო ინტეგრაციის და იურიდიულ საკითხთა კომიტეტებმა გაერთიანებულ სხდომაზე რამდენიმე კანონპროექტი განიხილეს.

კანონპროექტი „საქართველოს საარჩევნო კოდექსში“ ცვლილებების შეტანის შესახებ საქართველოს პარლამენტის შუალედური არჩევნების გამართვის ვადის სიხშირის ორჯერ გაზრდას ითვალისწინებს. კანონპროექტის თანახმად, მაჟორიტარული საარჩევნო ოლქებიდან არჩეული პარლამენტის წევრის გამოკლების შემთხვევაში წარმოქმნილი ვაკანსიების შესავსებად არჩევნები აპრილში ან ოქტომბერში გაიმართება, რათა ამომრჩეველი დიდი ხნით არ დარჩეს საკანონმდებლო ორგანოში თავისი წარმომადგენლის გარეშე. კანონპროექტი საერთო გადაწყვეტილებით დღევანდელ პლენარულ სხდომაზე დადგება განსახილველად.

დეპუტატები „საქართველოს პარლამენტის სამხედრო რწმუნებულის შესახებ“ საქართველოს კანონის პროექტის და მისგან გამომდინარე საკანონმდებლო ცვლილებების განხილვის პროცესში მივიდნენ გადაწყვეტილებამდე, რომ საკითხი ჯერ კიდევ არ არის სათანადოდ მომზადებული, ამიტომ მისი განხილვა მომავალი კვირისთვის გადაიდო.

რაც შეეხება „სახელმწიფო დაცვის სპეციალური სამსახურის შესახებ“ კანონში ცვლილების შესახებ პროექტს, იგი ითვალისწინებს, რომ სახელმწიფო დაცვის სპეციალური სამსახური, ნაცვლად პრეზიდენტის უშუალო დაქვემდებარებისა, გახდება მთავრობის უშუალო დაქვემდებარებაში არსებული აღმასრულებელი ხელისუფლების სპეციალური დანიშნულების გასამხედროებული დაწესებულება.