საქართველო, 19 ნოემბერი, საქინფორმი. საქართველოს საგარეო საქმეთა მინისტრ მაია ფანჯიკიძესა და ევროპისა და ევრაზიის საკითხებში აშშ-ის სახელმწიფო მდივნის თანაშემწე ფილიპ გორდონს შორის  შეხვედრა შედგა, რომელსაც ქართული მხრიდან ესწრებოდნენ საგარეო საქმეთა მინისტრის პირველი მოადგილე დავით ზალკალიანი, მინისტრის მოადგილე ნიკოლოზ ვაშაკიძე, რუსეთის ფედერაციაში საქართველოს პრემიერ-მინისტრის სპეციალური წარმომადგენელი ზურაბ აბაშიძე და საგარეო საქმეთა სამინისტროს ამერიკის დეპარტამენტის დირექტორი დავით ჭოჭუა.

შეხვედრაზე განხილულ იქნა აშშ-საქართველოს თანამშრომლობის არსებული საკითხები და ორმხრივი ურთიერთობების შემდგომი განვითარების პერსპექტივები. მხარეებმა ისაუბრეს ჟენევის მოლაპარაკებების ფორმატში თანამშრომლობის მიმართულებების შესახებაც და საგარეო საქმეთა მინისტრის მიერ ევროპაში განხორციელებული ვიზიტების თაობაზეც.

ფილიპ გორდონმა გამოხატა აშშ-ის მთავრობის ურყევი მხარდაჭერა საქართველოს სუვერენიტეტის, ტერიტორიული მთლიანობისა და ევროატლანტიკურ ალიანსში გაწევრებისადმი. მან მადლიერება გამოთქვა ავღანეთის ISAF-ის ოპერაციაში საქართველოს მიერ შეტანილი განსაკუთრებული წვლილისათვის.