საქართველო, 15 ნოემბერი, საქინფორმი. როგორც რეინტეგრაციის საკითხებში სახელმწიფო მინისტრის აპარატიდან საქინფორმს ატყობინებენ, რეინტეგრაციის საკითხებში საქართველოს სახელმწიფო მინისტრი პაატა ზაქარეიშვილი საქართველოში ევროკავშირის წარმომადგენლობის ხელმძღვანელს, ელჩ ფილიპ დიმიტროვს შეხვდა.

„იმის მიუხედავად, რომ ეს არ არის ჩვენი პირველი შეხვედრა, მაინც გვსურდა, შეხვედრა გამართულიყო, რადგან ბევრია ისეთი საკითხი, რომელთა განხილვაც საჭიროა ამ აპარატთან“, – აღნიშნა ელჩმა დიმიტროვმა.

მან აფხაზეთში, ცხინვალის რეგიონსა და საქართველოს სხვა რეგიონებში ევროკავშირის პროექტებისა და საქმიანობის მნიშვნელობაზე ისაუბრა. ელჩთან ერთად სახელმწიფო მინისტრის აპარატში ევროკავშირის წარმომადგენლობის პროექტების ხელმძღვანელი რამონ რეგადა და პოლიტიკური განყოფილების ხელმძღვანელის მოადგილე რენატა ვრობელიც იმყოფებოდნენ.