საქართველო, 14 ნოემბერი, საქინფორმი. ბიძინა ივანიშვილი, რომელიც ბელგიაში სამუშაო ვიზიტით იმყოფებოდა, იქ  მცხოვრებ ემიგრანტებს შეხვდა და ახალი მთავრობის გეგმებსა და ინიციატივებზე ესაუბრა. პრემიერმა შეხვედრაზე ყუარდღება საინვესტიციო ჯგუფის შექმნასა და ინვესტიციების მოზიდვაზე გაამახვილა. მისი თქმით, აღნიშნულ საკითხზე ბიზნესმენებთან მოლაპარაკება მიმდინარეობს და საინტერესო პროექტებს ხელისუფლება 75%-ით დააფინანსებს. შეხვედრას საქართველოს სავაჭრო პალატის პრეზიდენტი კახა ბაინდურაშვილიც ესწრებოდა.

„ყველაფერს ვაკეთებ იმისათვის, რომ შეიქმნას საინვესტიციო ფონდი, თანაც ამ ფონდის მონაწილეები ფულს კი არ კარგავენ, ეს არ არის შეწირულობა. ფონდის მონაწილეებს მე შევუქმნი საუკეთესო ჯგუფს, რომ ბიზნესპროექტების განხილვა შეეძლოს ძალიან მაღალ დონეზე. ვისაც ექნება ბიზნესწინადადება და 25%-მდე დაფინანსება, 75 % სახელმწიფოსგან გარანტირებული ექნება“.

პრემიერის თქმით, იგი 2014 წლის გაზაფხულზე ხელისუფლებიდან წავა, თუმცა მის მიერ დატოვებულ ხელისუფლებას სამოქალაქო საზოგადოებაში გადასული გააკონტროლებს. „მე არ წავალ დამარცხებული, მე დავტოვებ ძალიან კარგ ხელისუფლებას, ავიღებ პასუხისმგებლობას მასზე. გადავალ სამოქალაქო საზოგადოებაში და გავაკონტროლებ ჩემ მიერ დატოვებულ ხელისუფლებას“, – განაცხადა ბიძინა ივანიშვილმა.

ემიგრანტებთან შეხვედრაზე იმყოფებოდა ბელგიაში მცხოვრები მერაბ ბლადაძეც, რომლის ბინაშიც  ციხის კადრების გამავრცელებელი ბედუკაძე გარკვეულ ხანს ცხოვრობდა. ბლადაძემ ივანიშვილს წერილი გადასცა და განაცხადა, რომ წერილში საქართველოზე საუბრობს, თუმცა დეტალებზე საუბრისგან თავი შეიკავა.