თბილისი, 13 ნოემბერი, საქინფორმი. შს ყოფილი მინისტრის, ბაჩანა ახალაიასა, და გაერთიანებული შტაბის უფროს გიორგი კალანდაძის საქმეში ახალი ბრალეულობები გამოიკვეთა.

ამის შესახებ ინფორმაცია საქართველოს მთავარი პროკურატურის ოფიციალურ ვებგვერდზე ვრცელდება. პროკურატურის განცხადებით, 2010 წლის 10 თბერვალს გვარდიის დეპარტამენტის ასეულის 17 თანამშრომელმა დილის ვარჯიშზე უარი განაცხდა იმ მოტივით, რომ ისინი მთელი ღამის განმავლობაში მორიგეობდნენ. ახალაიას ბრძანებით, აღნიშნული პირები დასჯის მიზნით სენაკის სამხედრო ბაზაზე გადაიყვანეს, სადაც ბაჩო ახალაიამ და გიორგი კალანდაძემ მათ ფიზიკური და სიტყვიერი შეურაცხყოფა მიაყენეს, წელს ზევით გააშიშვლეს და სიცივეში არბენინეს, შემდეგ კი აბანოში ჩაკეტეს, გამოურთეს გათბობა და სამი დღე-ღამის განმავლობაში ასე ამყოფეს.

„აღნიშნული ქმედებით ბაჩანა ახალაიამ ჩაიდინა  საქართველოს სისხლის სამართლის კოდექსის 143-ე მუხლის მე-3 ნაწილის „ა“ და „გ“ ქვეპუნქტებით (თავისუფლების უკანონო აღკვეთა – ითვალისწინებს თავისუფლების აღკვეთას 7-დან 10 წლამდე) და 144¹ მუხლის  მე-2 ნაწილის „ბ" და „დ" ქვეპუნქტებით (წამება - ითვალისწინებს თავისუფლების აღკვეთას 9-დან 15 წლამდე) გათვალისწინებული დანაშაული.