საქართველოს ელჩი აშშ-ში თანამდებობას რამდენიმე თვეში დატოვებს

პოლიტიკა

1-iakobaSvili- თბილისი, 9 ნოემბერი, საქინფორმი. ამერიკის შეერთებულ შტატებში საქართველოს საგანგებო და სრულუფლებიანმა ელჩმა თემურ იაკობაშვილმა თანამდებობის დატოვების შესახებ განცხადება სოციალურ ქსელ „ფეისბუქში“ საკუთარ გვერდზე გაავრცელა. იაკობაშვილის განმარტებით, მისი მისია და საქმიანობა ამოიწურა. ამ ფაქტთან დაკავშირებით საგარეო საქმეთა მინისტრმა მაია ფანჯიკიძემ მედიასაშუალებებთან კომენტარი გააკეთა. მისი თქმით, ხელისუფლების ცვლამ ცვლილებები გამოიწვია დიპლომატიურ კორპუსშიც, თუმცა კვლავაც ხაზს უსვამს, რომ ეს არ ეხება დიპლომატების უმეტესობას.

როგორც საქართველოს საგარეო საქმეთა მინისტრმა აღნიშნა, ის ესაუბრა თემურ იაკობაშვილს. „მისი თანამდებობის დატოვება მოხდება ძალიან ცივილიზებული გზით, არა სასწრაფოდ, რადგან მას აქვს გარკვეული ვალდებულებები და ამ ვალდებულებების შესრულების შემდეგ მოხდება ამერიკის შეერთებულ შტატებში ახალი ელჩის დანიშვნა“, – აღნიშნა მაია ფანჯიკიძემ. რაც შეეხება ახალ კანდიდატურას, ის ამ ეტაპზე არ ასახელებს, რადგან, მისი თქმით, გარკვეული პროცედურებია გასავლელი.