აქტუალური
ყვითელი ავტობუსების მძღოლები გაიფიცნენ
თბილისი, 8 ნოემბერი, საქინფორმი. დღეს დილიდან თბილისში ყვითელი ავტობუსების მძღოლები გაიფიცნენ. ისინი ქალაქის ხელმძღვანელობისგან ხელფასების გაორმაგებას და სამუშაო პირობების გაუმჯობესებას ითხოვენ. 17-პუნქტიანი მოთხოვნა მძღოლებმა რამდენიმე დღის წინ შეიმუშავეს და მერიას გადასცეს. ამასთან, გაფიცულები ახალი შრომითი ხელშეკრულების გაფორმებას ითხოვენ, რომელშიც მათი უფლებები დაცული იქნება. მერიასთან შეკრებილ მძღოლებს წუხელ თბილისის სატრანსპორტო კომპანიის გენერალურმა დირექტორმა შეატყობინა, რომ ამ ეტაპზე ხელფასების მომატება შეუძლებელია. სწორედ ამის შემდეგ გადაწყვიტეს მძღოლებმა გამაფრთხილებელი გაფიცვის დაწყება. პროტესტის ამ ფორმას ქალაქში მდებარე სამივე ავტოპარკის 1300-ზე მეტმა მძღოლმა მიმართა.
საქართველოს სატრანსპორტო კავშირის პროფკავშირების თავმჯდომარე ლავრენტი ალანიამ მძღოლების სახელით ბოდიში მოუხადა ქალაქის მოსახლეობას მათი გადაადგილების შეფერხების გამო და განაცხადა, რომ ეს გამაფრთხილებელი აქციაა. მძღოლების განცხადებით კი, მათ მოთხოვნათა დაუკმაყოფილებლობის შემთხვევაში პროტესტი უფრო მასშტაბურ ფორმას მიიღებს.
თავის მხრივ, თბილისის მერიის ტრანსპორტის სამსახურის უფროსი აკაკი ჯოხაძე აცხადებს: „თბილისის სატრანსპორტო კომპანია ფინანსდება 45 მლნ ლარით თბილისის ბიუჯეტიდან. ხელფასების ზრდა წელს ფიზიკურად შეუძლებელია, ხოლო მომავალ წელს რაც შეეხება ხელფასების გადახედვას, ეს დამოკიდებულია ცენტრალური ბიუჯეტიდან გამოყოფილ ტრანსფერზე“. ჯოხაძემ მოუწოდა ყველა მძღოლს, აღადგინონ მოძრაობა და არ შეუქმნან თბილისელებს გადაადგილების პრობლემა.
მძღოლების პროტესტს თბილისის მერიაც გამოეხმაურა და განაცხადა, რომ მათი მოთხოვნების 17 პუნქტიდან 15 დაკმაყოფილებულია, თუმცა ეს არ ეხება ხელფასების მომატებას. მერიის განცხადების მიუხედავად, პრობლემა ჯერ არ აღმოფხვრილა და დედაქალაქელები, ძირითადად, სამარშრუტო ტაქსებით გადაადგილდებიან.
