თბილისი, 7 ნოემბერი, საქინფორმი. ტელეკომპანია „იმედის“ დარბევიდან 5 წლის შემდეგ, დღეს, 22.00 საათზე, მოეწყობა თოქშოუ, სადაც ტელეკომპანიის ყოფილი ჟურნალისტები, პოლიტიკოსები, მედიაექსპერტები და პოლიტიკური მიმომხილველები გაიხსენებენ მოვლენებს, რომლის მონაწილენიც ისინი იყვნენ, იმსჯელებენ 7 ნოემბრის შედეგებზე და ისაუბრებენ იმაზე, თუ როგორ შეიძლებოდა ამ მოვლენების თავიდან აცილება. გადაცემა შეეცდება, გაარკვიოს, თუ რა მოხდა 2007 წლის 7 ნოემბერს და როგორ აისახა ეს დღე მომდევნო ხუთ წელიწადზე. „ღია ეთერის“ წამყვანები იქნებიან „იმედის“ ყოფილი ჟურნალისტები: ეკა ხოფერია, თეა სიჭინავა და დიანა ტრაპაიძე.
„თოქშოუ ერთდროულად გავა სამი ტელეკომპანიის – „იმედის“, „მაესტროსა“ და „მე-9 არხის“ – პირდაპირ ეთერში, ეყოლება სამი წამყვანი და მასში სხვადასხვა ფორმით მონაწილეობას მიიღებს ორასზე მეტი ადამიანი.
დღესვე ტელეკომპანია „იმედის“ ეთერში გავა 4 მოკლემეტრაჟიანი დოკუმენტური ფილმი „იმედის“ დარბევის შესახებ, რომელსაც გადაცემა „იმედის გმირების“ სარედაქციო ჯგუფი ამზადებს. ფილმები ეთერში ერთი კვირის განმავლობაში იტრიალებს.

დღეიდან ტელეკომპანია ვიზუალურ გაფორმებასა და ფერთა პალიტრას უბრუნდება, დაბრუნდა „იმედის“ პირველი ლოგო.