თბილისი, 7 ნოემბერი, საქინფორმი. „2012 წლის 7 ნოემბერს, გამთენიისას, 5 საათსა და 20 წუთზე, დაკავებული იქნა საქართველოს შეიარაღებული ძალების გაერთიანებული შტაბის უფროსი გენერალი გირგი კალანდაძე, რადგან მას ბრალი ედება სს კოდექსის 333-ე მუხლით გათვალისწინებულ დანაშაულში – სამსახურებრივი უფლებამოსილების გადამეტება. ის დაკავებულ იქნა მთავარი პროკურორის თანდასწრებით, მას განემარტა ყველა უფლება, რომელიც აქვს ბრალდებულს, რომ ჰყავდეს ადვოკატი, შეინარჩუნოს დუმილი და არ გასცეს შეკითხვებს პასუხი, აგრეთვე, თუ სურს, ისარგებლოს კანონმდებლობით და კონსტიტუციით გათვალისწინებული ყველა სხვა უფლებით“, – განაცხადა დღეს დილით, 10 საათზე, იუსტიციის სამინისტროში გამართულ სპეციალურ ბრიფინგზე საქართველოს იუსტიციის მინისტრმა თეა წულუკიანმა.

როგორც წულუკიანმა განმარტა, დაკავებულის ამ უფლებების განხორციელება მოხდა ადგილზევე, იგი არ დაუკითხავთ, განხორციელდა მხოლოდ პირადი ჩხრეკა და მას მიეცა ორჯერ წინადადება, გამოეძახა დამსწრეები ჩხრეკის დროს, რაზეც კალანდაძემ უარი განაცხადა.

„მას მიეცა საშუალება, განეხორციელებინა რამდენიმე ზარი. ის დაუკავშირდა თავის ახლობელს, როგორც ამას ითვალისწინებს კანონი. ამცნო დაკავების ფაქტის შესახებ და როგორც ეს ეგების, თავისი ოჯახი ჩააბარა ერთგულ პირს. შემდეგი ზარებიც მან განახორციელა იმავე წესით, შეუზღუდავად. დაკავება მოხდა ნორმალურ, მშვიდ გარემოში და იგეგმებოდა მისი ორივე ბინის ჩხრეკა. თუმცა, მთავარ პროკურორთან ერთობლივი შეთანხმებით. ჩვენ მივიღეთ გადაწყვეტილება, არ მომხდარიყო მისი საცხოვრისის ჩხრეკა, სადაც იმყოფებოდნენ მისი მეუღლე და ორი მცირეწლოვანი შვილი და ეს ჩხრეკა გადაიდო გათენებამდე, რათა ოჯახს არ განეცადა ის დიდი სტრესი, რაც შეიძლება იყოს ღამით ჩხრეკის ჩატარება“, – განმარტა მინისტრმა.

მისივე თქმით, დაკავებისას გიორგი კალანდაძე სიმშვიდეს ინარჩუნებდა, ხოლო „გარეგნული, ვიზუალური დათვალიერებით სხეულზე არავითარი დაზიანება დაკავების დროს არ აღენიშნებოდა, მისი ყველა უფლება დაკავებისას და პირადი ჩხრეკისას იყო დაცული“.