თბილისი, 5 ნოემბერი, საქინფორმი. დღეს ჭიათურაში გაფიცულმა მაღაროელებმა „ჯორჯიან მანგანეზის“ ადმინისტრაციის თანამშრომლები  შენობაში არ შეუშვეს. გაფიცულები ხელფასების 40 პროცენტით მომატებასა და სამუშაო პირობების გაუმჯობესებას ითხოვენ და ამ დრომდე პასუხს ელოდებიან. ითხვისის მაღაროში 20-მდე მაღაროელი მჯდომარე აქციას ატარებს. მათ შორის არიან ქალებიც, რომელთაგან ერთ-ერთი ფეხმძიმედაა.

„News.ge“-ს ინფორმაციით, აქციის ერთ-ერთი მონაწილე განმარტავს, რომ ის 32 პროცენტი, რომელსაც „ჯორჯიან მანგანეზის“ ხელმძღვანელობა გაფიცულებს ჰპირდება, პრემიალური სისტემის გაუქმების, კერძოდ, პრემიის 21%-ის ჩამოჭრის ხარჯზე მოიმატებს და, ფაქტობრივად, ადმინისტრაცია მათ ხელფასს 11%-ით მომატებას სთავაზობს.

„თანამშრომელთა ნაწილმა დაიწყო მუშაობა, ნაწილი კი გაფიცვას აგრძლებს. მათ ადმინისტრაციას მოთხოვნები წაუყენეს. ჩვენი პოზიცია მათი მოთხოვნების მიმართ უკვე დავაფიქსირეთ – ჩვენ მათ ხელფასების 32-პროცენტიან ზრდას დავპირდით“, – განაცხადა კომპანია „ჯორჯიან მანგანეზის“ ერთ-ერთმა წარმომადგენელმა.