სამართალი
გიორგი გაჩეჩილაძე გირაოს გადახდისთანავე გათავისუფლდება
თბილისი, 2 ნოემბერი, საქინფორმი. ლევან გაჩეჩილაძის შვილი, გიორგი გაჩეჩილაძე, დღეს ჩანიშნული თბილისის საქალაქო სასამართლოს გადაწყვეტილებით, 5 000 ლარის ოდენობის გირაოს გადახდის შემდეგ გათავისუფლდება.
რაც შეეხება საქმის განხილვას, დღეს საქმეში წარმოდგენილი მტკიცებულებები საბოლოო განაჩენის სამართლიანად გამოტანისთვის არ იყო საკმარისი. შემდგომი სხდომა 24 დეკემბერს არის ჩანიშნული.
მაღალი საზოგადოებრივი ინტერესის გათვალისწინებით, მოსამართლემ ჟურნალისტებს პროცესის ვიდეოგადაღების უფლება მისცა.
როგორც უკვე ცნობილია, ვაკის მაჟორიტარი დეპუტატი, ადვოკატი შალვა შავგულიძე გაგა გაჩეჩილაძეს თავდებში უდგება, რომ ის არ დაემალება გამოძიებას და სასამართლოს ხელს არ შეუშლის ჭეშმარიტების დადგენაში. შეგახსენებთ: საქართველოს შინაგან საქმეთა სამინისტროს ინფორმაციით, ძველი თბილისის რაიონულმა სამმართველომ გიორგი გაჩეჩილაძე 27 ოქტომბერს დააკავა. მას ბრალი წაუყენეს სისხლის სამართლის კოდექსის 239-ე მუხლის მესამე ნაწილით (ხულიგნობა, ჩადენილი ცეცხლსასროლი იარაღის ან იარაღად სხვა საგნის გამოყენებით).საქმე ეხება გრიბოედოვის ქუჩაზე მდებარე კაფე „გალერეაში“ მომხდარ ჩხუბს, რომლის დროსაც კაფეს დაცვის ერთ-ერთი თანამშრომელი დაიჭრა. ინციდენტის თაობაზე ვიდეომასალა ჟურნალმა „ტაბულამ“ გაავრცელა, სადაც ჩხუბის კადრებში ფიგურირებს ლევან გაჩეჩილაძის შვილი გიორგი გაჩეჩილაძე. აღნიშნულის შესახებ კომენტარი გააკეთა ადვოკატმა ლალი აფციაურმა, რომლის განცხადებით, პროკურატურის მიერ წარდგენილი ბრალდება პოლიტიკურ ნიშანს ატარებს. „პირდაპირ მინდა ვთქვა, რომ ამ საქმეს აქვს პოლიტიკური სარჩული, გამომდინარე იქიდან, რომ საქმის ზედამხედველი პროკურორი დავით ზვიადაძე არის ახალაიების უახლოესი მეგობარი, ეს ადამიანი არის ყველა იმ სისხლის სამართლის საქმეში, რომლითაც ალბათ მომავალში ახალაიები საბრალდებო სკამზე დაჯდებიან. ის არაერთი ისეთი საქმის ზედამხედველი იყო, სადაც მართლები გამოდიოდნენ ახალაიები. გიორგის დაკავების გადაწყვეტილება სწორედ ძველმა პროკურორმა მიიღო“, – აცხადებს გაგა გაჩეჩილაძის ადვოკატი ლალი აფციაური.
