თბილისი, 1 ნოემბერი, საქინფორმი. საქართველოს ენერგეტიკისა და ბუნებრივი რესურსების მინისტრმა კახა კალაძემ თავისი მოადგილეები წარადგინა. აღნიშნულ თანამდებობაზე მარიამ ვალიშვილი, ილია ელოშვილი და გია ქავთარაძე დაინიშნენ. მინისტრის განცხადებით, კანდიდატურების შერჩევისას გათვალისწინებულ იქნა მათი პატიოსნება და პროფესიონალიზმი. როგორც კალაძემ აღნიშნა, სამი მოადგილე ამ ეტაპზე სრულიად საკმარისია, რადგან სამინისტროში რესტრუქტურიზაცია იგეგმება. მინისტრის მოადგილეების განცხადებით, მათი პრიორიტეტი მომსახურების ხარისხის გაუმჯობესება, ელექტრომომარაგებისა და გაზმომარაგების ხელმისაწვდომობა და ინვესტიციების შემოდინებაა.

როგორც ილია ელოშვილმა აღნიშნა, მათ საქმიანობაში პრიორიტეტი იქნება საკითხი, თუ „რამდენად შეიძლება ტარიფების შემცირება და რა იქნება შემცირების მარჟა“, ასევე, გარემოს დაცვის კუთხით საერთაშორისო სტანდარტების შესაბამისად ჰესების მშენებლობა.

გია ქავთარაძე ენერგეტიკის სფეროში გაფორმებული ხელშეკრულებების იურიდიული თვალსაზრისით გადახედვას აპირებს – რამდენად არის დაცული სახელმწიფოს ინტერესები და როგორ შესრულდა ვალდებულებები.