თბილისი, 1 ნოემბერი, საქინფორმი. საქართველოს შინაგან საქმეთა მინისტრმა ირაკლი ღარიბაშვილმა გუშინ საქართველოს საპატრულო პოლიციის დეპარტამენტის ახალი უფროსი წარადგინა. მას ამიერიდან დავით ცინარიძე უხელმძღვანელებს.

როგორც მინისტრმა ცინარიძის წარდგენისას განაცხადა, საპატრულო პოლიციის შექმნა ჩვენი ხალხის საერთო მონაპოვარია, მისი შენარჩუნება და განვითარება თითოეული ჩვენგანის საზრუნავია. „ამიტომ ყველაზე მეტად ის უნდა გამოირჩეოდეს განსაკუთრებული სისპეტაკით, დისციპლინითა და მოქალაქეების მიმართ კეთილგანწყობით, ის უნდა იყოს კანონის დაცვის სამაგალითო ნიმუში ქცეყანაში. კოალიციის მიერ დეკლარირებული სამი მთავარი პრინციპი – კანონიერება, სამართლიანობა და ჰუმანიზმი პატრულის ყოველდღიური საქმიანობის მთავარი ორიენტირი უნდა იყოს“, – განაცხადა ირაკლი ღარიბაშვილმა.

მინისტრმა აღნიშნა დავით ცინარიძის დამსახურებები პატრულის შექმნის საწყის ეტაპზე. ღარიბაშვილი დარწმუნებულია, რომ მას გააზრებული აქვს ის მაღალი პასუხისმგებლობა, რასაც საპატრულო პოლიციას სახელმწიფო და საზოგადოება აკისრებს.