თბილისი, 29 ოქტომბერი, საქინფორმი. როგორც საქინფორმს „თავისუფალი საქართველოს“ პრესსამსახურიდან ატყობინებენ, პარტია საკონსტიტუციო სასამართლოსგან განმარტებებს ითხოვს საპრეზიდენტო ვადებთან დაკავშირებით –  კონკრეტულად როდის იწურება საქართველოს მოქმედი პრეზიდენტის უფლებამოსილების ვადა და როდის უნდა ჩატარდეს მორიგი საპრეზიდენტო არჩევნები.

საქართველოს მოქმედი კონსტიტუციის 70-ე მუხლის 1-ლი პუნქტის თანახმად, საქართველოს პრეზიდენტი აირჩევა 5 წლის ვადით. თუმცა, ამავე მუხლის მე-9 პუნქტით, მორიგი არჩევნები ტარდება პრეზიდენტის უფლებამოსილების ვადის ამოწურვის კალენდარული წლის ოქტომბერში.

„მიხეილ სააკაშვილი მეორე ვადით პრეზიდენტად იქნა არჩეული 2008 წლის 5 იანვარს. აქედან გამომდინარე, მას საპრეზიდენტო ვადა (კონსტიტუციით გათვალისწინებული 5 წელი) ეწურება 2013 წლის 5 იანვარს. თუმცა, რადგან მომდევნო არჩევნები უნდა ჩატარდეს 2013 წლის ოქტომბერში, გამოდის, რომ სააკაშვილს უფლებამოსილება უნარჩუნდება დამატებით 10 თვის მანძილზე, რაც, ბუნებრივია, თავად კონსტიტუციით დადგენილი ნორმის დარღვევაა“, – აღნიშნულია განცხადებაში.