თბილისი, 26 ოქტომბერი, საქინფორმი. როგორც საქინფორმი უკვე იტყობინებოდა, მინისტრთა ნაწილი დღეს მათდამი დაქვემდებარებულ უწყებებში მივიდა. მათ შორის გახლდათ სოზარ სუბარიც, რომელმაც კაბინეტში შესვლისთანავე პრეზიდენტ სააკაშვილის სურათი კედლიდან ჩამოხსნა. მისივე თქმით, ამ ქმედებით სამინისტრო წარსულისგან გაათავისუფლა.

სუბარის განმარტებით, იგი კაბინეტში არც ივანიშვილის სურათს დაკიდებს და ამგვარი ქმედებები, ზოგადად, უმართებულოდ მიაჩნია. პრეზიდენტის სურათის ჩამოხსნის მოტივაცია კი მან ასე განმარტა: „ამ ადამიანმა შექმნა ის მახინჯი სისტემა, რომელთან ბრძოლაც დღეს გვიწევს. სააკაშვილმა საქართველო ერთ დიდ საპატიმროდ გადააქცია, სადაც ყველას უსმენდნენ და აკონტროლებდნენ, სადაც თავისუფლად სუნთქვა იყო შეუძლებელი“.

ახალი მინისტრის შეფასებით, ციხე ამ დიდ საპატიმროს ერთი ნაწილი იყო და ეს მახინჯი სისტემა ადამიანების ტვინიდან უნდა ამოიშანთოს.