თბილისი, 19 ოქტომბერი, საქინფორმი. გლდანის ციხესთან უკანონოდ დაპატიმრებულთა მხარდასაჭერად აქცია იმართება. ციხესთან იმყოფებიან 2011 წლის 26 მაისს ყინწვისში სახელმწიფო გადატრიალების ბრალდებით დაკავებული ვეტერანის – ზურაბ გელაშვილის, ახლობლები.

ოჯახის წევრების განცხადებით, ზურაბ გელაშვილი უკანონოდ არის დაკავებული. ის 26 მაისს,  ყინწვისის მონასტერში მოსალოცად  ყოფნის დროს, ოცდაოთხ უცნობ პირთან ერთად დააპატიმრეს. „ყინწვისის მონასტერში მოსალოცად წასულ ხალხს ბრალად წაუყენეს სახელმწიფო ღალატი – შეთქმულება. ესენი არიან სამხედრო ვეტერანები, რომლებმაც წლების განმავლობაში არაერთხელ შეუშვირეს მკერდი ტყვიას ქვეყნის კეთილდღეობისათვის, დღეს კი ეს ხალხი პრეზიდენტ სააკაშვილს სახელმწიფო მოღალატეებად გამოჰყავს“, – განაცხადა რატი კვანტრიშვილმა. მისი თქმით, ახლობლები პრეზიდენტისგან მოითხოვენ მათ დაუყოვნებლივ განთავისუფლებას და ამ საქმეში დამნაშავე პირების დასჯას, კერძოდ, ვინც აწამა და ამ გზით მიიღო ამ ადამიანებისგან აღიარებითი ჩვენებები – პროკურორი ჭანკვეტაძე, გამომძიებელი ხიზანაიძე და მოსამართლე არევაძე“.

აქციის მონაწილეებმა მოითხოვეს, უკანონოდ დაპატიმრებულნი 10-დღიან ვადაში გაათავისუფლონ. წინააღმდეგ შემთხვევაში, პერმანენტული აქციები გაგრძელდება პრეზიდენტის სასახლესთან, სადაც ჩაეთვება უამრავი არასამთავრობო და საერთაშორისო ორგანიზაციაც.