პოლიტიკა
ჯეიმს აპატურაი „ქართული ოცნების“ ლიდერებს შეხვდა
თბილისი, 19 ოქტომბერი, საქინფორმი. პრემიერმინისტრობის კანდიდატმა, „ქართული ოცნების“ ლიდერმა ბიძინა ივანიშვილმა საქართველოში ვიზიტად მყოფ ნატოს გენერალური მდივნის სპეციალურ წარმომადგენელს სამხრეთ კავკასიასა და ცენტრალურ აზიაში ჯეიმს აპატურაის უმასპინძლა. შეხვედრის ძირითადი თემა საქართველოს ნატოში გაწევრების პერსპექტივები იყო. „ჩვენ ჩავაბარეთ ძალიან საინტერესო გამოცდა, რასაც ჰქვია არჩევნები. ამით განისაზღვრებოდა ჩვენი პერსპექტივა. მე შევახსენე მას, რომ ჩვენ ეს გავაკეთეთ. ახლა მათ უფრო პრინციპული, უფრო პრაქტიკული ნაბიჯები უნდა გადადგან იმისათვის, რომ საქართველოს ნატოში რეალური გაწევრება უახლოეს მომავალში მოხერხდეს. ჩვენ, ჩვენი მხრივ, ყველაფერს გავაკეთებთ იმისთვის, რომ საქართველოში ჭეშმარიტი დემოკრატიული ინსტიტუტები ჩამოყალიბდეს, რაც ნატოს წევრი ქვეყნებისთვის აუცილებელი მოთხოვნაა“, – განაცხადა ბიძინა ივანიშვილმა შეხვედრის დასრულების შემდეგ.
ივანიშვილის ბიზნესცენტრში თავდაცვის მინისტრობის კანდიდატ ირაკლი ალასანიასა და ჯეიმს აპატურაის შეხვედრის მთავარი თემა საქართველო-ნატოს ურთიერთობები და ის რეფორმები იყო, რომელთა განხორციელებაც თავდაცვის უწყებაში სამომავლოდ იგეგმება. შეხვედრის დასასრულ კომენტარში ალასანიამ აღნიშნა, რომ მაღალი შეფასებები აქვს თავდაცვის სამინისტროს შეიარაღებული ძალების წარმომადგენლებს, რომლებიც ავღანეთში გმირულად იბრძვიან და, ზოგადად, ჩვენი ურთიერთობების მომავალს.
როგორც ალასანიამ განაცხადა, მომავალი წელი იქნება ნატოსთან დასაახლოებლად გადადგმული კიდევ ერთი ნაბიჯი, რასაც ხელისუფლების დემოკრატიულად გადაცემამ დიდწილად შეუწყო ხელი. „კონკრეტულად იყო პერსპექტივებზე საუბარი, დაახლოების, თავდაცვის უწყებებს შორის ურთიერთობის გაღრმავების ბევრი მექანიზმი ბოლომდე არ არის ათვისებული და საგარეო საქმეთა მინისტრების შეხვედრის შემდეგ კიდევ უფრო მეტი სიცხადე შევა ჩვენი ნატოსთან ორმხრივი ურთიერთობის მომავლის საკითხში“, – განაცხადა ირაკლი ალასანიამ და დასძინა, რომ „ISAF“-ის ოპერაციასთან დაკავშირებით ქართული მხარის მიდგომა და პოლიტიკა ნათლად დადასტურდა. „ვიდრე არ დასრულდება ჩვენი მისია ავღანეთში, ჩვენ შევინარჩუნებთ იქ ჩვენს სამხედრო შენაერთებს“, – განაცხადა მან.
