თბილისი, 10 ოქტომბერი, საქინფორმი. დღეს თბილისის საკრებულოს სხდომაზე ერთიანი კომუნალური გადასახადების ცვლილებებთან დაკავშირებით საკითხი წამოჭრა საკრებულოს თავმჯდომარის მოადგილემ, „ქრისტიან-დემოკრატიული“ ფრაქციის წარმომადგენელმა ჯაბა სამუშიამ. სხდომაზე იმსჯელეს მოსახლეობისათვის მეტად მტკივნეულ საკითხზე – გაუქმდება თუ არა ელექტროენერგიის გადასახადზე მიბმული  დასუფთავების გადასახადის ერთიანი ქვითარი და გაითიშება თუ არა ელექტროენერგიის მიწოდება სხვა დავალიანების გადაუხდელობის გამო.

ჯაბა სამუშიას  განცხადებით, „საკრებულოს პირველსავე სხდომაზე პირადად ჩემ მიერ წარდგება გადაწყვეტილების პროექტი, რომლითაც უნდა მოხდეს დენისა და დასუფთავების გადასახადის ისევ გაყოფა და იმ გადაწყვეტილების გაუქმება, რომელიც მიიღო საკრებულომ 2011 წლის ივნისში, რადგან ამ გადაწყვეტილებამ თბილისელების 90%-ს გაუძვირა გადასახადი და ჩააგდო საკმაოდ მძიმე სოციალურ მდგომარეობაში“.

ჯაბა სამუშიას ამ განცხადებას ოფიციალური განცხადება მოჰყვა თბილისის მერიის მხრიდან.