თბილისი, 8 ოქტომბერი, საქინფორმი. დღეს „ერთიანი ნაციონალური მოძრაობის“ ოფისში  ამომრჩეველზე ზეწოლის ფაქტებზე სასაუბროდ საგანგებო ბრიფინგი გაიმართა. საუბარი შეეხო გურჯაანის რაიონს, სადაც „ერთიანი ნაციონალური მოძრაობის“ თქმით, ხშირია „ქართული ოცნების“ აქტივისტების მხრიდან ამომრჩევლის დაშინებისა და ფიზიკური ანგარიშსწორების მუქარის ფაქტები.

„ნაციონალური მოძრაობის“ წარმომადგენელ ზურაბ ჭიაბერაშვილის განცხადებით, როცა „ქვეყანაში ჩატარდა თავისუფალი და სამართლიანი არჩევნები, მიმდინარეობს ხელისუფლების გადაბარების აბსოლუტურად მშვიდი და დემოკრატიული პროცესი, ასეთ დროს ცალკეულ ადგილებში ცალკეული პირების მიერ ზეწოლა, ფიზიკური ანგარიშსწორების მუქარა შეუსაბამოა იმ პრინციპებთან, რაც ჩვენ, როგორც ქართველ საზოგადოებას, და, განსაკუთრებით „ერთიან ნაციონალურ მოძრაობას“, გვინდა, რომ იყოს“. ჭიაბერაშვილმა ჩამოთვალა იმ ადამიანთა ვინაობა, ვისაც, მისი განმარტებით, ემუქრებიან და აშინებენ: გია მელიქიშვილი, თემურ ბუტაშვილი, ალექსანდრე იმერლიშვილი, გოგიტა და ზურა შავკაციშვილები. მან დაასახელა ის პიროვნებაც, ვინც სატელეფონო მუქარას ახორციელებს: ჯონი ოსიაშვილი.

მისივე თქმით, „ნაცმოძრაობის“ აქტივისტებისთვის ცნობილია ამ ადამიანის ტელეფონის ნომერი, რომელსაც ისინი შესაბამის ორგანოებს მიაწვდიან.