საზოგადოება
დავით ბაქრაძე: „ჩვენ პატივს ვცემთ ქართველი ხალხის არჩევანს“
თბილისი, 3 ოქტომბერი, საქინფორმი. პოლიტიკური პარტია „ერთიანი ნაციონალური მოძრაობის“ ოფისში დღეს გამართულ პრესკონფერენციაზე პარტიის საარჩევნო სიის პირველმა ნომერმა დავით ბაქრაძემ განცხადება გააკეთა პარტიისა და საპარლამენტო გუნდის სახელით, სადაც აღნიშნა, რომ პირველი ოქტომბრის საპარლამენტო არჩევნები იყო ძალიან დიდი და სერიოზული გამოცდა ქართული სახელმწიფოსთვის. მან მადლობა გადაუხადა „ნაციონალური მოძრაობის“ ყველა მხარდამჭერს არჩევნებზე გამოჩენილი პრინციპულობისა და ორგანიზებულობისთვის.
„დღეს ყველა ჩვენგანის მოვალეობაა, უკვე ოპოზიციიდან გავაგრძელოთ ბრძოლა ქართული სახელმწიფოს და ქართული დემოკრატიის კიდევ უფრო გაძლიერებისთვის, რომ საქართველომ გააგრძელოს წინსვლა და არასდროს არ დაბრუნდეს უკან“, – განაცხადა დავით ბაქრაძემ.
როგორც მან განაცხადა, „ნაციონალური მოძრაობა“ არის ის ძალა, რომელმაც შექმნა ქართული სახელმწიფო ქაოსიდან, სიბნელიდან და არაფრიდან; ძალა, რომელიც დღეს ყველას აძლევს დემოკრატიული გადასვლის, დემოკრატიული პასუხისმგებლობისა და ქცევის მაგალითს. „ჩვენ ვიქნებით ძალიან აქტიური, ძალიან მტკიცე, ამავე დროს, კონსტრუქციული ყველაფერში , სადაც საჭირო იქნება ქართული სახელმწიფოს და ქართული დემოკრატიისათვის“, – განაცხადა დავით ბაქრაძემ.
