საზოგადოება
არასამთავრობო ორგანიზაციები: „მასმედიამ და დამკვირვებლებმა თავიანთი მნიშვნელობა დაკარგეს“
თბილისი, 26 სექტემბერი, საქინფორმი. საქართველოს ახალგაზრდა იურისტთა ასოციაციის აღმასრულებელმა დირექტორმა ეკა ფოფხაძემ ჟურნალისტებს განუცხადა, რომ ცენტრალური საარჩევნო კომისიის დადგენილების პირვანდელმა ვარიანტმა მხოლოდ კოსმეტიკური ცვლილებები განიცადა. მისი თქმით, არასამთავრობო ორგანიზაციები ცესკოს გადაწყვეტილებას არ ეთანხმებიან, რადგან მიაჩნიათ, რომ „საარჩევნო კოდექსი ისედაც კარგად არეგულირებს მასმედიისა და დამკვირვებლების მუშაობას“.
„სინამდვილეში ახალი დადგენილება უამრავ ბარიერს უქმნის ჟურნალისტებს და დამკვირვებლებს. ვგულისხმობ ნორმას, რომლის მიხედვით, თუ ადამიანი გადაღების ადგილს მიატოვებს, დაბრუნებას ვეღარ შეძლებს“, – განმარტა ფოფხაძემ და განაცხადა, რომ ახალგაზრდა იურისტთა ასოციაცია თავის პოზიციას საერთაშორისო ორგანიზაციებს გააცნობს.
რეგიონული მედიის ასოციაციის თავმჯდომარე ია მამალაძის შეფასებით, ფაქტობრივად, მასმედიის წარმომადგენელთა და დამკვირვებლების აკრედიტაციამ მნიშვნელობა დაკარგა, რადგან მათ საარჩევნო უბნებზე ნორმალური მუშაობის შესაძლებლობას არ აძლევენ. „წარმოუდგენელია კამერებისთვის საგანგებო ადგილების გამოყოფა, რადგან ზოგიერთ ადგილას საარჩევნო უბნები ორი ოთახისგან შედგება. არცერთი ჩვენი მოთხოვნა, ფაქტობრივად, გათვალისწინებული არ იქნა“, – ამტკიცებს მამალაძე.
