თბილისი, 24 სექტემბერი, საქინფორმი. ზუგდიდში საარჩევნო ბლოკ „ქართული ოცნების“ ერთ-ერთი ყველაზე მრავალრიცხოვანი წინასაარჩევნო აქცია გაიმართა, რომელზეც ბლოკის მხარდამჭერები სამეგრელო-ზემო სვანეთის ყველა რაიონიდან შეგროვდნენ. მათ შორის იყვნენ, აგრეთვე, ქართველი ემიგრანტები, რომლებიც სამშობლოში ჩამოვიდნენ, რათა მათთვის არჩევნებში მონაწილეობის უფლების შეზღუდვა გაეპროტესტებინათ.

ბიძინა ივანიშვილმა ტრადიციულად წარადგინა თითოეული რაიონის მაჟორიტარი დეპუტატობის კანდიდატები და ხაზი გაუსვა, რომ როგორი დამსახურებული ადამიანებიც უნდა იყვნენ მმართველი პარტია „ერთიანი ნაციონალური მოძრაობის“ კანდიდატები, ისინი დღევანდელ ძალადობრივ რეჟიმს წარმოადგენენ. მისი თქმით, პატიმრებზე ძალადობისა და წამების ფაქტები მმართველი რეჟიმის მიერ ჩადენილი დანაშაულებების მხოლოდ ნაწილია და ამ ხელისუფლების დაშლა ძალიან მალე დაიწყება.

მიხეილ სააკაშვილის მთავარმა ოპონენტმა თავის მოწინააღმდეგეს „საქართველოს ჯალათი“ უწოდა.

„მათი პასუხისმგებლობის დღე ახლოვდება, და ეს არის პირველი ოქტომბერი. მათ ამ დღის ეშინიათ, რადგან კანონის მთელი სიმკაცრით მოუწევთ პასუხისგება“, – განაცხადა ივანიშვილმა და პირობა დადო, რომ საქართველოში სამართლიანობა აღდგება და სამართლიანი მართლმსაჯულება დამყარდება.

გუშინ პოლიტიკური კოალიცია „ქართული ოცნების“ ლიდერი ბიძინა ივანიშვილი ლანჩხუთისა და ჩოხატაურის მოსახლეობას შეხვდა.