თბილისი, 19 სექტემბერი, საქინფორმი. ახალგაზრდა იურისტთა ასოციაციის თავმჯდომარე თამარ ჩუგოშვილის განცხადებით, სასჯელაღსრულების სისტემაში არსებული ვითარებიდან გამომდინარე, უნდა დადგეს მაღალი თანამდებობების პირების პასუხისმგებლობის საკითხი როგორც სამართლებრივად, ისე  პოლიტიკურად.
როგორც თამარ ჩუგოშვილმა გლდანის ციხესთან მიმდინარე აქციაზე ჟურნალისტებს განუცხადა, პასუხისმგებლობაში უნდა მიეცენ არა მხოლოდ სასჯელაღსრულების სამინისტროს, არამედ იუსტიციის სამინისტროს სისტემაში მომუშავე პირები, იქიდან გამომდინარე, რომ წლების განმავლობაში მათ ევალებოდათ პატიმართა მიმართ არსებული დარღვევების გამოძიება და მათზე რეაგირება. „წლების განმავლობაში ჩვენ, და არა მხოლოდ ჩვენ, ვსაუბრობდით, რომ საპატიმროებში ადგილი აქვს წამებას და არასათანადო მოპყრობას. არასოდეს ხელისუფლების მხრიდან ამას არ მოჰყოლია ადეკვატური რეაგირება, იყო სრული დაუსჯელობა. სწორედ ამიტომ მივიღეთ სურათი, როდესაც შემზარავი შემთხვევები ხდება პატიმართა მიმართ. სწორედ აქედან გამომდინარე მიმაჩნია, რომ სისხლის სამართლის წესით გარკვეული პირების, განსაკუთრებით, ბადრაგების დასჯა აბსოლუტურად არაადეკვატურია. ეს არის შემთხვევა, როდესაც ძალიან მაღალი თანამდებობის პირების პასუხისმგებლობის საკითხი უნდა დადგეს“, – განაცხადა თამარ ჩუგოშვილმა.

როგორც დღეს იუწყება საქინფორმი, პატიმრებზე ძალადობის ამსახველი 3 ვიდეომასალა ტელეკომპანია „მაესტრომ“ და „TV 9“-მ გაავრცელეს გუშინ, საღამოს და ღამით, ასევე გავრცელდა სოციალურ ქსელ „Facebook“-ში ქართველი ემიგრანტის – გიორგი ფოფხაძის – მიერ. მასალებში ნაჩვენები იყო პატიმართა წამების კადრები (რომლებიც სასჯელს გლდანის №8 საპყრობილეში იხდიან), ასევე, გაუპატიურება დუბინკებით უკანა ტანიდან, უკიდურესად სასტიკი ცემა და დამამცირებელი ფორმა – ციხის ადმინისტრაციასთან თანამშრომლობის მიზნით. სამივე ეს ვიდეო შესაბამის ევროსტრუქტურებს გადაეცა.