თბილისი, 17 სექტემბერი, საქინფორმი. საპარლამენტო არჩევნების მოახლოებასთან ერთად ორმა მთავარმა ნაციონალურმა მაუწყებელმა – „რუსთავი 2“-მა და „იმედმა“ – მნიშვნელოვნად გაზარდა პოლიტიკური რეკლამის ფასები.

დამდეგ კვირაში ერთწუთიანი პოლიტიკური რეკლამა „რუსთავი 2“-ზე შაბათ-კვირის დილის საათებში, მინიმუმ, 1 975 ლარი ეღირება, ხოლო ხუთშაბათს გადაცემა „პროფილში“  – 22 222 ლარი; „რუსთავი 2“-ზე ყველაზე ძვირადღირებული რეკლამა, ასევე, უეფას ჩემპიონთა ლიგის თამაშების დროს გავა, როდესაც ერთწუთიანი რეკლამის ფასი 17 284 ლარი ეღირება; იგივე ტარიფი იქნება „რუსთავი 2“-ის კომედიურ სერიალში; საინფორმაციო გამოშვებაში – „კურიერი 9 საათზე“ – ერთწუთიანი რეკლამის ფასი 16 296 ლარი ეღირება. „რუსთავი 2“-ზე ერთწუთიანი რეკლამის ფასები ერთი თვის წინათ 660 ლარიდან 6 250 ლარამდე მერყეობდა.

ერთწუთიანი პოლიტიკური რეკლამა ტელეკომპანია „იმედზე“ შაბათ-კვირის დილის საათებში მინიმალური 2 469 ლარი ეღირება, ხოლო სამშაბათს გადაცემა „ნანუკას შოუსა“ და შაბათ-კვირას კომედიურ სერიალ „შუა ქალაქში“ –  22 222 ლარი.

ერთწუთიანი პოლიტიკური რეკლამა „იმედის“ მთავარ საინფორმაციო გადაცემაში საღამოს 8 საათზე 16 296 ლარი ეღირება. ერთი თვის წინათ „იმედზე“ ერთწუთიანი რეკლამის ფასები 990 ლარიდან 4 940 ლარამდე მერყეობდა.

ტარიფები თითქმის განახევრდა საქართველოს საზოგადოებრივი მაუწყებლის პირველ არხზე და ერთწუთიანი პოლიტიკური რეკლამის მინიმალური ფასი 1 575 ლარამდე შემცირდა, ხოლო რეკლამის ყველაზე ძვირი ფასი 3 150 ლარია.

აგვისტოს შუა რიცხვების შემდეგ ტელეკომპანია „კავკასიამ“ ოდნავ გაზარდა რეკლამის ფასები და ახლა მისი ღირებულება წუთში 300 ლარიდან 900 ლარამდე მერყეობს.

ტელეკომპანია „მაესტრომაც“ უმნიშვნელოდ გაზარდა ფასები; ამჟამად ერთწუთიანი პოლიტიკური რეკლამის ფასი დილით და შუადღისას 800 ლარს შეადგენს, ხოლო  საღამოს და გვიან ღამით – 1300 ლარს.

ტელეკომპანია „მეცხრე არხმა“, ძირითადად, შეინარჩუნა აგვისტოში არსებული ფასები; ამ ტელეკომპანიას, სხვებთან შედარებით, ყველაზე დაბალი სარეკლამო ფასები აქვს; რეკლამის წუთი 100 ლარიდან 390 ლარამდე ღირს.

საარჩევნო კოდექსი ავალდებულებს მაუწყებლებს, რომ თანაბარი ფასები დააწესოს პოლიტიკურ რეკლამებზე ყველა პოლიტიკური პარტიისთვის.

ტელეკომპანიები ვალდებულები არიან, უსასყიდლოდ გამოუყონ დრო ყოველ 3 საათში 90 წამის ოდენობით კვალიფიციურ პოლიტიკურ სუბიექტებს, ანუ პარტიებს, რომლებმაც წინა საპარლამენტო არჩევნებზე 4% ან ადგილობრივ არჩევნებზე ხმების 3% მაინც მიიღეს. საზოგადოებრივი მაუწყებელი კი ვალდებულია, მათი  წინასაარჩევნო რეკლამა ყოველ საათში 60 წამის ოდენობით განათავსოს.