თბილისი, 17 სექტემბერი, საქინფორმი. დღეიდან საქართველოს საჯარო სკოლებში 2012-2013 სასწავლო წელი დაიწყო. განათლებისა და მეცნიერების სამინისტროს ინფორმაციით, უწყება სოციალური პროგრამის ფარგლებში მოსწავლეთათვის უფასო სახელმძღვანელოების გადაცემას აგრძელებს. წელს პირველიდან მე-12 კლასის ჩათვლით სახელმწიფოსაგან საჩუქრად სასკოლო სახელმძღვანელოებს 140 000 მოსწავლე  მიიღებს. სახელმძღვანელოები გადაეცემათ სოციალურად დაუცველი ოჯახების წევრებს; იმ ოჯახების მოსწავლეებს, სადაც ერთდროულად სამი ან მეტი და-ძმა სწავლობს სკოლაში და 2008 წლის აგვისტოს ომში დაღუპული მეომრების შვილებს.

ამ სამი კატეგორიის მოსწავლეებზე სულ ერთ მილიონამდე წიგნი გაიცემა და ეს სახელმძღვანელოები მათ სკოლაში დახვდებათ.

გარდა ამისა, ყველა საჯარო სკოლის პირველკლასელს სკოლაში დახვდება ნეტბუკი „ბუკი“.

2012-2013 სასწავლო წლისათვის საქართველოს სკოლებისთვის შექმნილი ნეტბუკები 41 272 პირველკლასელს და მათ 3078 დამრიგებელს საჩუქრად გადაეცემათ. „ბუკები“ კომპანიებმა –  „ალგორითმმა“ და „ინტელმა“ – საქართველოში დაამზადეს.