თბილისი, 13 სექტემბერი, საქინფორმი. კვლევითი ცენტრი „Forsa“-ს გამოკითხვის შედეგების მიხედვით, კითხვას – შემდეგ კვირას რომ საპარლამენტო არჩევნები ტარდებოდეს, რესპონდენტთა 49% მხარს „ქართულ ოცნებას“ უჭერს. კვლევის პრეზენტაცია გუშინ სასტუმრო „ქორთიარდ მარიოტში“ გაიმართა.

კვლევის მიხედვით, იმავე კითხვაზე რესპონდენტთა 43% „ნაციონალური მოძრაობის“ სასარგებლოდ პასუხობს, გამოკითხულთა 6% „ქრისტიან-დემოკრატებს“ უჭერს მხარს, სხვა პარტიებს კი რესპონდენტთა 2% აძლევს ხმას.

კვლევაში „ქართული ოცნება“ კიდევ ერთ საკითხში ლიდერობს. „Forsa“-ს გამოკითხვის მიხედვით, რესპონდენტთა 35%-ის აზრით, ქვეყანაში არსებული პრობლემების გადაჭრას ყველაზე ეფექტურად კოალიცია „ქართული ოცნება“ შეძლებს, მეორე ადგილზე 34%-ით აქაც „ნაციონალური მოძრაობაა“. 25%-მა შეკითხვაზე პასუხი არ იცის, 5%-ის აზრით კი, ქვეყანაში არსებული პრობლემების ყველაზე ეფექტურად გადაჭრა „ქრისტიან-დემოკრატებს“ შეუძლიათ.

„Forsa“-ს მიერ ჩატარებული სოციოლოგიური გამოკითხვის მიხედვით, პირდაპირი არჩევნები რომ ტარდებოდეს, პრემიერ-მინისტრად გამოკითხულთა 43% კოალიცია „ქართული ოცნების“ ლიდერ ბიძინა ივანიშვილს აირჩევდა. რეიტინგში მეორეა 33%-ით „ერთიანი ნაციონალური მოძრაობის“ პრემიერობის კანდიდატი ვანო მერაბიშვილია, დანარჩენი 24% კი, აცხადებს, რომ ხმას პრემიერმინისტრობის ან არცერთ კანდიდატს არ მისცემდა, ან არა აქვს პასუხი.