სამართალი
„ელიტა ბურჯის“ ადვოკატი: „ბიძინა ივანიშვილმა გაგასეირნოს!..“
თბილისი, 30 აგვისტო, საქინფორმი. იმედა ნიკურაძე, „ელიტა ბურჯის“ ადვოკატი, 20-დღიანი ადმინისტრაციული პატიმრობიდან გაათავისუფლეს. როგორც სასჯელაღსრულების დაწესებულებიდან გამოსულმა ნიკურაძემ ჟურნალისტებს განუცხადა, ციხის ადმინისტრაციამ მას წყალი, საკვები და სხვა საჭირო ნივთები დაკავებიდან მხოლოდ მესამე დღეს მისცა. ამასთან, ნიკურაძე ამბობს, რომ პატიმრობის განმავლობაში მას „ნაციონალური მოძრაობის“ კლიპს – „მიშა მაგარიას“ ასმენინებდნენ.
„როდესაც კანონით დადგენილ გასეირნებას ვითხოვდი, მპასუხობდნენ, ბიძინა ივანიშვილმა გაგასეირნოსო“, – განაცხადა ნიკურაძემ.
ნიკურაძეს სასჯელაღსრულების დაწესებულებასთან ადვოკატთა კორპუსის წარმომადგენლები და უფლებადამცველები დახვდნენ.
შეგახსენებთ, რომ იმედა ნიკურაძე აღსრულების ბიუროს თანამშრომლებისა და პოლიციის დაუმორჩილებლობის ბრალდებით 8 აგვისტოს დააკავეს. გამოძიების ინფორმაციით, როდესაც შპს „ბურჯის“ მიმართ სააღსრულებო პროცედურები ხორციელდებოდა, ცალკეული პირების მხრიდან ადგილი ჰქონდა პოლიციისთვის ხელის შეშლის ფაქტს.
