თბილისი, 30 აგვისტო, საქინფორმი. საქართველოს პარლამენტის თავმჯდომარემ, „ნაციონალური მოძრაობის“ საარჩევნო სიის პირველმა ნომერმა დავით ბაქრაძემ ქართული ძალების მიერ კახეთში, რუსეთის საზღვრის სიახლოვეს ჩატარებული სპეცოპერაციის შეფასებისას აღნიშნა, რომ  საქართველო დაიცავს საკუთარი მოქალაქეების უსაფრთხოებას ნებისმიერ პირობებში.

„ჩვენ მოქალაქეებს შეუძლიათ იყვნენ მშვიდად იმიტომ, რომ დღეს, განსხვავებით ათი წლის წინანდელისგან, განსხვავებით იმისგან, სადაც უნდათ ზოგიერთ ჯგუფებს ჩვენი მიბრუნება, დღეს საქართველო არის სახელმწიფო, რომელსაც ჰყავს შეიარაღებული ძალები, პოლიცია, ხელისუფლება და დღეს საქართველო არის სახელმწიფო, რომელიც დაიცავს საკუთარი მოქალაქეების უსაფრთხოებას ნებისმიერ პირობებში“, – განაცხადა მან, სავარაუდოდ, მხედველობაში ჰყავდა რა „ზოგიერთ ჯგუფებში“ მთავარი საარჩევნო კონკურენტ ბიძინა ივანიშვილის ოპოზიციური კოალიცია, რომელზეც ხელისუფლება ხშირად აცხადებს, რომ მას ქვეყნის წარსულში დაბრუნება სურს.

„რაც არ უნდა დიდი იყოს პრობლემა ან გამოწვევა, ჩვენს მოქალაქეებს, ჩვენ მოსახლეობას შეუძლიათ იყვნენ მშვიდად – ქართული სახელმწიფო იცავდა და დაიცავს მათ უსაფრთხოებას“, – დასძინა ბაქრაძემ.

შეგახსენებთ: ოთხშაბათს ღამით კახეთში დაწყებულ ოპერაციას, რომელსაც ხელისუფლებამ დივერსანტთა შეიარაღებული ჯგუფის დევნისა და „ანტიტერორისტული“ ოპერაცია უწოდა, შინაგან საქმეთა სამინისტროს ორი სპეცრაზმელი და თავდაცვის სამინისტროს სპეციალური ოპერაციების ძალების ექიმი ემსხვერპლა. ხუთი ქართველი ძალოვანი დაჭრილია, რომლებიც ამჟამად ჰოსპიტალიზებული არიან. ოფიციალური ინფორმაციით, მათ სიცოცხლეს საფრთხე არ ემუქრება.