თბილისი, 28 აგვისტო, საქინფორმი. არჩევნების პორტალს (www.electionportal.ge) გასული არჩევნებისა და ამომრჩეველთა სიების მონაცემები დაემატა (www.data.electionportal.ge). ვებგვერდის მეშვეობით შესაძლებელია 2008 წლიდან მოყოლებული თითოეული არჩევნების შედეგების ნახვა ყველა ინდიკატორით ცალ-ცალკე: ამომრჩევლების აქტივობა, ცალკეული პარტიების შედეგები, საერთო მონაცემები და ა.შ. ვებგვერდზე მონაცემები განთავსებულია კონკრეტული საარჩევნო ოლქებისა და უბნების მიხედვით.

ამერიკის ეროვნულ-დემოკრატიული ინსტიტუტი „NDI“-ს საქართველოს ოფისის ხელმძღვანელ ლუის ნავაროს განცხადებით, არჩევნების შედეგებთან ერთად, საიტი მოქალაქეებს ამომრჩეველთა სიის ანალიზსაც სთავაზობს. მომხმარებელი ნახავს 2006 წლიდან არსებულ ამომრჩეველთა სიას, რომელსაც უახლოეს მომავალში ორი სია დაემატება: 2012 წლის ამომრჩეველთა ერთიანი სია და სიების დაზუსტების კომისიის მიერ „კარდაკარის“ დაწყებამდე არსებული ერთიანი ძველი სია.

„ვებგვერდი დააინტერესებს ყველას, ვისაც პოლიტიკა აინტერესებს. მონაცემთა ბაზა პოლიტიკურ პარტიებს დაეხმარება საარჩევნო კამპანიის დაგეგმვაში და საშუალებას მისცემს, წინა არჩევნების შედეგების გათვალისწინებით განსაზღვრონ მათი პოტენციური მხარდაჭერის არეალები. ვებგვერდი, ასევე, დაეხმარება მკვლევარებს საარჩევნო ტენდენციების განსაზღვრაში“, – ამბობს ლუის ნავარო.

არჩევნების საიტი ყურადღებას ამახვილებს წინასაარჩევნო კამპანიაზე და რეგიონებში აღმოჩენილ დარღვევებზე. საიტი პირდაპირ რეჟიმში იმუშავებს არჩევნების დღესაც. მოქალაქეებს შეუძლიათ ელექტრონულად განათავსონ აღმოჩენილი ხარვეზების შესახებ ინფორმაცია საიტზე, ასევე, ფოტო და ვიდეომასალა.  პორტალთან ერთად მოქმედებს უფასო SMS ნომერი 2500, რომელზეც ინფორმაციის გაგზავნა შეეძლება ნებისმიერ მოქალაქეს ნებისმიერი მობილური ქსელიდან.

შეგახსენებთ, რომ  არასამთავრობო ორგანიზაციების არჩევნების პორტალი წარმოადგენს „სამართლიანი არჩევნებისა და დემოკრატიის საერთაშორისო საზოგადოების“, „საქართველოს ახალგაზრდა იურისტთა ასოციაციისა“ და „საერთაშორისო გამჭვირვალობა – საქართველოს“ ერთობლივ ინიციატივას.