საზოგადოება
ცესკომ „ქართულ ოცნებას“ საარჩევნო ნომერი „7“ შეუცვალა „41“-ით, რასაც სასამართლოში გაასაჩივრებენ
თბილისი, 21 აგვისტო, საქინფორმი. კოალიცია „ქართული ოცნება“ ცენტრალური საარჩევნო კომისიის მიერ მათთვის საარჩევნო ნომრად „41“-ის მინიჭებას სასამართლოში გაასაჩივრებს. ამის შესახებ ჟურნალისტებს კოალიციის ერთ-ერთმა ლიდერმა ზვიად ძიძიგურმა განუცხადა და ცესკოს მიერ მიღებული გადაწყვეტილება „პოლიტიკურად“ შეაფასა.
„სასამართლოსთან უფრო ფართომასშტაბიანი აქციები გაიმართება, რათა „ქართული ოცნების“ მომხრეებმა თავიანთი კანონიერი უფლებები არა მარტო სასამართლოს გზით, არამედ საპროტესტო აქციებითაც დაიცვან“, – აღნიშნა ძიძიგურმა.
კოალიციის კიდევ ერთი ლიდერის – თინა ხიდაშელის, თქმით კი, „ქართულ ოცნებას“ მთელი საარჩევნო ატრიბუტიკა უკვე დაბეჭდილი აქვს და მასზე საარჩევნო ნომრად „7“-ია მითითებული.
„უკვე დაბეჭდილი გვაქვს ბუკლეტები, მაისურები და მთელი საარჩევნო ატრიბუტიკა, რომლებზეც მითითებულია, რომ „ქართული ოცნების“ საარჩევნო ნომერი არის „7“. ამის თავიდან გაკეთება ძალიან ძნელი იქნება, რადგან კოალიციაში შემავალი პარტიების ანგარიშები დაყადაღებულია“, – განმარტა ხიდაშელმა ჟურნალისტებთან საუბარში.
