პოლიტიკა
ბიძინა ივანიშვილი მიხეილ სააკაშვილს ტელედებატებში იწვევს
თბილისი, 21 აგვისტო, საქინფორმი. ოპოზიციური კოალიცია „ქართული ოცნების“ ლიდერმა ბიძინა ივანიშვილმა მმართველი პარტია „ნაციონალური მოძრაობის“ თავმჯდომარე, პრეზიდენტი მიხეილ სააკაშვილი 1 ოქტომბრის საპარლამენტო არჩევნების წინ ტელედებატებში გამოიწვია.
„ორი დიდი ძალაა გამოკვეთილი – ჩვენი კოალიცია და „ნაციონალური მოძრაობა“ პრეზიდენტის ხელმძღვანელობით. მე დღეს... ვიწვევ ტელედებატებში მიხეილ სააკაშვილს ნებისმიერ დროს, ნებისმიერ სიტუაციაში, ნებისმიერი ფორმით. ეს არის ლოგიკური“, – განაცხადა ივანიშვილმა.
„თუ ვერ შეძლებს მიხეილ სააკაშვილი, მაშინ მისი გუნდიდან ხელისუფლების წარმომადგენლებს (ერთ კაცთან არ დავჯდები), რა თქმა უნდა, შეუძლიათ 5 ან 7-ზე მეტი შეიკრიბონ, ვთქვათ, პარლამენტის და მთავრობის წარმომადგენლები“, – აღნიშნა მან.
ივანიშვილმა, ასევე, განაცხადა, რომ მისი კოალიცია არ მიიღებს მონაწილეობას დებატებში „ქრისტიან-დემოკრატიული მოძრაობის“, „ახალი მემარჯვენეებისა“ და „ლეიბორისტული პარტიის“ წარმომადგენლებთან, რომელთაც მან ცრუ ოპოზიცია უწოდა.
„თუ მათ სურვილი აქვთ ჩემთან შეხვედრის (დებატებში, – საქინფორმი), მე თანხმობას ვაცხადებ ერთი პირობით, რომ მათ უნდა აღიარონ, რომ ისინი ხელისუფლებას წარმოადგენენ. ასეთ შემთხვევაში, მეც და ჩემი კოალიციის წარმომადგენლებიც, მათთან დებატებში დაჯდებიან. ცრუ ოპოზიციასთან ჩვენ დებატებში არ დავჯდებით“, – განაცხადა მან.
