თბილისი, 17 აგვისტო, საქინფორმი. კოალიცია „ქართული ოცნებაში“ „თავისუფალი დემოკრატების“ ლიდერმა ირაკლი ალასანიამ შეიძლება განიმტკიცოს თავისი პოზიციები. ამის შესახებ ბიძინა ივანიშვილმა გუშინ ბათუმში გამართულ ბრიფინგზე განაცხადა. მისი თქმით, ალასანია შესაძლებელია, ვიხილოთ საქართველოში ნებისმიერ უმაღლეს პოსტზე, თუმცა, ჯერ არაა გადაწყვეტილი, ვინ სად იქნება.

„ირაკლი ალასანია არის ძალიან საინტერესო და გამოცდილი პოლიტიკოსი, მას ძალიან კარგად იცნობენ ამერიკაშიც. ძალიან პრინციპული და საინტერესო პიროვნებაა. შესაბამისად, მე სიამოვნებით გავიმეორებდი იმას, რომ ირაკლი ალასანია შეიძლება ვიხილოთ მომავალში საქართველოს ნებისმიერ უმაღლეს პოსტზე. მაგრამ დღეს არ ვაცხადებთ ჩვენ, ვინ სად იქნება და როგორ იქნება, მაგრამ ის ფაქტი, რომ აქვს შესაძლებლობა და პოტენცია ამის, ჩემთვის ძალიან საინტერესოა. რაც შეეხება საპრეზიდენტო კანდიდატს, ამაზე ჯერ არაა საუბარი“, – განაცხადა ივანიშვილმა.