თბილისი, 14 აგვისტო, საქინფორმი. დავით გამყრელიძემ, „ახალი მემარჯვენეების“ ლიდერმა  საპარლამენტო არჩევნებისთვის პარტიის წინასაარჩევნო 4-წლიანი პროგრამის პრეზენტაცია გამართა. პროგრამის სათაური პარტიის მთავარი სლოგანია: „შეძლებული ოჯახი სოფლად და ქალაქად“.

გამყრელიძის თქმით, ოჯახი რომ შეძლებული იყოს, მისი შემოსავალი თვეში, მინიმუმ, 1000 ლარს უნდა შეადგენდეს, „და არა ისე, როგორც ვანო მერაბიშვილი გვპირდება 1000-ლარიან ვაუჩერს 4 წლის განმავლობაში“, – დასძენს დავით გამყრელიძე.

მისი თქმით, გაწერილია პროგრამის ბიუჯეტიც და მასში თითოეული პრიორიტეტისთვის განკუთვნილი დაფინანსების წყაროცაა ასახული. როგორც გამყრელიძემ აღნიშნა, სახელმწიფო ბიუჯეტში სახელმწიფო ხარჯების წილი 7-დან 1.5 პროცენტამდე უნდა შემცირდეს. „ჩვენ სახელისუფლებო და ოპოზიციურ პარტიებს მოვუწოდებთ, რომ პროგრამები ასე გაწერილად წარმოადგინონ“, – აღნიშნავს მემარჯვენეთა ლიდერი და თითოეული საკითხის შესახებ მათ დებატებზე იწვევს.