თბილისი, 10 აგვისტო, საქინფორმი. აგვისტოს ომთან დაკავშირებით „მე-9 არხზე“ დაშვებული შეცდომა პრეზიდენტმა სააკაშვილმა გამოიყენა, რათა ბიძინა ივანიშვილი გაეკრიტიკებინა, რომლის მისამართითაც განაცხადა, რომ ვლადიმერ პუტინი „ქართული ოცნების“ ლიდერისა და „მისი მონების“ „პატრონია“.

8 აგვისტოს ომის ოთხი წლისთავთან დაკავშირებით მომზადებულ სიუჟეტში, რომელიც მაშინდელ მოვლენებს ეხებოდა, „მე-9 არხის“ წამყვანმა 12-საათიან საინფორმაციო გამოშვებაში საინფორმაციო სააგენტო „GHN“-ის მიერ მომზადებული ტექსტი წაიკითხა, სადაც ნათქვამი იყო: „2008 წლის 7 აგვისტოს რუსი სამხედროების ზურგგამაგრებულ ოს სეპარატისტებს და ქართულ ჯარს შორის საბრძოლო მოქმედებები დაიწყო. ომში რუსეთი ოფიციალურად 8 აგვისტოს ჩაერთო, რომელმაც რეგიონში საკუთარი ჯარების ქვედანაყოფები და მძიმე ტექნიკა ლეგალურად შეიყვანა“.

3-საათიან საინფორმაციო გამოშვებაში ტელეკომპანიამ ბოდიში მოიხადა იმ ინფორმაციის გამო, სადაც ნათქვამი იყო, რომ რუსეთმა ლეგალურად შეიყვანა თავისი ჯარები, და ამაში ბრალი საინფორმაციო სააგენტოს დასდო, რომლის ტექტსიც წამყვანმა წაიკითხა. საინფორმაციო სააგენტო „GHN“-მა განაცხადა, რომ მან შეცდომა დაუშვა, რადგან მის თავდაპირველ ტექსტში სიტყვა „ლეგალურად“ ბრჭყალებში არ იყო ჩასმული.

„მე-9 არხის“ საინფორმაციო სამსახური ბოდიშს იხდის 12-საათიან გამოშვებაში გასული უზუსტობის გამო. აქვე „მე-9 არხი“ კიდევ ერთხელ აზუსტებს, რომ არ ეთანხმება ტექსტის ამგვარ ფორმულირებას“, – განაცხადა ტელეკომპანიის საინფორმაციო გადაცემის წამყვანმა.

„მე-9 არხი“ ერთადერთი ტელეკომპანია არ ყოფილა, რომელმაც ეს ტექსტი წაიკითხა; ტელეკომპანია „იმედის“ ჟურნალისტმა 7 აგვისტოს 11-საათიან საინფორმაციო გამოშვებაში პირდაპირი ჩართვისას იგივე ტექსტი გამოიყენა და თქვა, რომ რუსეთმა „ლეგალურად“ შეიყვანა თავისი ჯარი რეგიონში.

შეგახსენებთ: ტელეკომპანია „იმედის“ თანამფლობელი სააკაშვილის მოკავშირე და ეკონომიკის ყოფილი მინისტრი გიორგი არველაძეა.

8 აგვისტოს ფოთში საუბრისას, რომელიც აგვისტოს ომის დროს რუსეთის საჰაერო დარტყმების ერთ-ერთი სამიზნე იყო, პრეზიდენტმა სააკაშვილმა განაცხადა:  „დღეს დილით ერთ-ერთი პოლიტიკური პარტიის სატელევიზიო არხმა გამოაცხადა, რომ რუსეთის ძალებმა, რომლებმაც დაბობმეს ჩვენი ტერიტორია, რომლებიც შემოიჭრნენ, ფეხქვეშ გათელეს  ჩვენი სოფლები, ჩვენი ქალაქები, ჩვენი ხალხის სიცოცხლეები, რომ თურმე რუსეთის არმია მოქმედებდა სრულიად კანონიერად საქართველოს ტერიტორიაზე“.

„ის ხალხი, ვინც ამას ამბობს – ჩვენ დემოკრატიული ქვეყანა ვართ და მათ შეუძლიათ იფიქრონ, რასაც ფიქრობენ – ვერავინ ვერ აუკრძალავს ფიქრს. მათ შეუძლიათ, თქვან, რაც უნდათ, რაც არ უნდა ამაზრზენი და საზიზღარი იყოს ეს ყველაფერი, – განაცხადა სააკაშვილმა. – მაგრამ რაღაც ელემენტარული ღვთისნიერება, რაღაც იოტისოდენა წესიერება მაინც არ უნდა გაგაჩნდეს? რომ ეს არ ილაპარაკო ყველაფერი იმ დღეს, როცა ყველანი გაჩერებულები უნდა ვიყოთ და პატივს მივაგებდეთ ჩვენ დაცემულ თანამოქალაქეებს, ჩვენს მებრძოლებს და ჩვენს მშვიდობიან ხალხს? ნუთუ პატარა სოლიდარობა, პატარა უნარი ტკივილის გაზიარების ამ ხალხს საერთოდ არ გააჩნია?“

„არცერთი კანონი არ კრძალავს საქართველოში ასეთ ფიქრს და ასე ლაპარაკს, მაგრამ არცერთი კანონი არ გვიკრძალავს ჩვენ, რომ გამოვხატოთ ის, რასაც  ამ ხალხის  მიმართ ვფიქრობთ“, – განაგრძო მან.

„ერთია, რომ გეზიზღებოდეს შენი მთავრობა, მეორეა, რომ ამართლებდე შენი ქვეყნის წინააღმდეგ აგრესიას და შენი ქვეყნის დაპყრობისა და განადგურების მცდელობას“, – განაცახდა მან.

შემდეგ მან საუბარი რუსეთის პრეზიდენტ ვლადიმერ პუტინის მიერ 8 აგვისტოს გაკეთებული განცხადების შესახებ განაგრძო და მას „დანაშაულის აღიარება“ უწოდა.  ცნობისათვის: პუტინმა განაცხადა, რომ რუსეთის შეიარაღებული ძალების გენერალურ შტაბს სამხრეთ ოსეთის წინააღმდეგ თბილისის შესაძლო თავდასხმის მოგერიების გეგმა აგვისტოს ომამდე დაახლოებით ერთი წლით ადრე ჰქონდა მომზადებული და ამას გარდა, სამხრეთ ოსეთის ამბოხებულებსაც წვრთნიდა ამ გეგმის ფარგლებში.

„ყველაზე პარადოქსი კი, მეგობრებო ჩემო, ის არის, რომ დღეს იმ ომის მთავარმა ინიციატორმა და დამნაშავემ, ვლადიმერ პუტინმა, სრულიად ნათლად თვითონ განაცხადა, რომ რამდენიმე წლის განმავლობაში გეგმავდა და ამზადებდა შეიარაღებულ რაზმებს ჩვენი დამოუკიდებელი, სუვერენული ტერიტორიის შიგნით, რაც არის საერთაშორისო აგრესიის კლასიკური სამართლებრივი განმარტება“, – განაცხადა სააკაშვილმა.

„თვითონ აღიარა და ამ წუთში, როცა გამოდის ეს კაცი და „მე გავაკეთე, ხო მე გავაკეთე და ვამაყობ ამით“, არიან ქართველი პოლიტიკოსები და მათი (მედია, – საქინფორმი) საშუალებები, რუსული ფულით დაფინანსებული, რომლებიც ამბობენ, რომლებიც თესავენ გაურკვევლობას და დაბნეულობას ამ ყველაფრის გარშემო და ერთსა და იმავე იდიოტურ კითხვას სვამენ და იდიოტის გარდა არავინ არ დასვამს ამ კითხვას, რომ „ბოლოს და ბოლოსმ ვინ დაიწყო ეს ომი?“, – განაცხადა მან.

„მე მინდა, მივმართო ამ ხალხს, ამ კაცს და ამ ხალხს და მის მონებს, თვითონ თქვენმა პატრონმა პუტინმა დღეს თქვა, რომ მან დაიწყო ომი და ის ამით ამაყობს. იქნებ გადახედოთ თქვენს ვერსიებს ამ მთელი ისტორიების და მოარგოთ იმას მაინც, რაც თვითონ პუტინმა განაცხადა“, – განაცხადა სააკაშვილმა.

„ეს როგორ გამოდის, იცით? დამნაშავე რომ გამოდის და იძახის, რომ კი, მე ჩავიდინე დანაშაული... და მისი ფულით დაფინანსებული ადვოკატი იძახის: „არა,  არა ეს ის არ არის, რასაც თქვენ ფიქრობთ, – განაცხადა სააკაშვილმა. – განსხვავება არ უნდა იყოს პუტინსა და თქვენსშორის? მე ამ ხალხს მინდა, მივმართო. ის ხომ პუტინია და თქვენ ხომ ქართველები ხართ. და როგორ შეიძლება იყოს გაურკვევლობა და დაბნეულობა იმის შესახებ, რომ ვინ დაბომბა ჩვენი სახლები, ჩვენი ქალაქები, ვინ დაბომბა ეს პორტი?“

ასევე, 8 აგვისტოს საქართველოს საგარეო საქმეთა სამინისტრომ განცხადება გამოქვეყნა, რომელშიც ნათქვამია, რომ პუტინის „პირდაპირი აღიარება, რომ 2008 წლის აგრესია წინასწარგანზრახული ხასიათისა იყო, კონფლიქტის არსის შეფასებისათვის მნიშვნელოვან საფუძველს იძლევა“.