თბილისი, 9 აგვისტო, საქინფორმი. პრეზიდენტმა სააკაშვილმა ომის მეოთხე წლისთავისადმი მიძღვნილ ღონისძიებაზე განაცხადა, რომ საქართველომ ვერ მოიგო აგვისტოს ომი, მაგრამ რუსეთმაც ვერაფერი მოიგო.

გორის სამხერო აკადემიაში გამოსვლისას, სადაც, ასევე, იმყოფებოდნენ სამხედროები და აგვისტოს ომის დროს დაღუპული ჯარისკაცების ოჯახის წევრები, სააკაშვილმა განაცხადა, რომ რუსეთმა ვერ მიაღწია ვერცერთ თავის მთავარ სტრატეგიულ მიზანს საქართველოსთან მიმართებაში.

თავის გამოსვლაში მან „ახალ პუტინურ გეგმაზეც“ ისაუბრა, რომელიც საქართველოს შიგნიდან გატეხას და მის დამორჩილებას ისახავს მიზნად.

„რუსეთი 7 აგვისტოს წლების განმავლობაში ამზადებდა, – განაცხადა მან. – ეს იყო საქართველოს სრული დამორჩილება, ეს იყო თბილისის აღება და საქართველოს საგარეო პოლიტიკური კურსის 180 გრადუსით შემობრუნება“.

„ახლა ხშირად არის კამათი პოლიტიკოსებში, საქართველომ მოიგო თუ წააგო ეს ომი. სანამ ჩვენს მიწაზე აქედან რამდენიმე კილომეტრში ოკუპანტები დგანან, როგორ მოგვიბრუნდება ენა, რომ ვთქვათ, რომ ჩვენ ეს ომი მოვიგეთ. მაგრამ მოდით დავსვათ კითხვა, რა მოიგო რუსეთმა?“, – განაცხადა სააკაშვილმა და დასძინა, რომ რუსეთმა ვერაფერი ვერ მოიგო, ვინაიდან მისი მთავარი მიზანი – მთელი საქართველო დაეპყრო – ვერ განხორციელდა.

„რუსეთს სამი მთავარი სტრატეგიული ამოცანა ჰქონდა, როდესაც ის ოთხი წლის წინ საქართველოში შემოიჭრა“, – განაცხადა სააკაშვილმა.

მისი თქმით, რუსეთის პირველი ამოცანა საქართველოს მთავრობის დამხობა და მისი ლიდერების ფიზიკური განადგურება იყო.

„მათ ეს, რა თქმა უნდა, ვერ განახორციელეს. საქართველოს ჰყავს იგივე მთავრობა, ესე იგი რუსეთი არ არის გამარჯვებული“, – განაცხადა სააკაშვილმა.

მისი თქმით, რუსეთის მეორე ამოცანა იყო საქართველოს, როგორც ენერგორესურსების სატრანზიტო მარშრუტის როლის მოსპობა. „რუსეთმა ეს ვერ მოახერხა, ესე იგი რუსი ოკუპანტი არ არის გამარჯვებული“, – დასძინა მან.

„რუსეთის მესამე სტრატეგიული ამოცანა იყო საქართველოს ნატოსა და ევროკავშირში ინტეგრაციის შეჩერება“, – განაცხადა სააკაშვილმა და დასძინა, რომ კრემლმა ამ მიზანსაც ვერ მიაღწია.

„ჩვენ ძალიან ახლოს ვართ ევროკავშირთან ასოცირების ხელშეკრულებასთან, უვიზო მიმოსვლასთან, თავისუფალ ვაჭრობასთან, ევროკავშირის წევრობის პერსპექტივის გამოცხადებასთან“, – განაცხადა მან. ნატოში ინტეგრაციასთან დაკავშირებით კი აღნიშნა, რომ ალიანსის შემდეგი 2014 წლის სამიტი გაფართოებას მიეძღვნება და საქართველო იქნება საყოველთაო კონსენსუსით ერთ-ერთი უპირველესი კანდიდატი. „ესე იგი, რუსეთი არ არის გამარჯვებული!“ – დასძინა მან.

„მოსკოვში ჯერ კიდევ ცოცხლობს საბჭოთა ოცნება; შესაბამისად, მათ ახალი გეგმა აქვთ საქართველოსთვის, ეს გეგმა ითვალისწინებს საქართველოს შიგნიდან გატეხას... ახლა მათ გადაწყვიტეს, რომ ჩვენი ქვეყნის დამორჩილება ისევ ქართველთა ხელით ჯობს. ამ ახალი პუტინური გეგმის გათვლა ემყარება იმას, რომ ქართველები დაიღლებიან წინააღმდეგობის გაწევით“.

„ამ ახალი გეგმის ავტორებს, სამწუხაროდ, კარგად აქვთ შესწავლილი საქართველოს ისტორია და იციან, რომ ყოველთვის შეიძლება მოიძებნოს ისეთი ქართველი, რომელიც საკუთარი კეთილდღეობის სანაცვლოდ დამპყრობელთან შერიგებას დათანხმდება“, – განაცხადა მან.

მან, ასევე, განაცხადა, რომ „დათვისთვის ბაბაიას დაძახება“ არ იმუშავებს.

სააკაშვილის თქმით, ის ფაქტი, რომ საქართელოს სახელმწიფო დროშა კვლავ ფრიალებს თბილისის თავზე, აღიზიანებს ჩვენ დამპყრობლებს და მათ ადგილობრივ დამქაშებს.

„რამდენიც არ უნდა იოცნებონ ჩვენმა დამპყრობლებმა და მათმა ადგილობრივმა დამქაშებმა, საბჭოთა კავშირი არ აღდგება“, – განაცხადა სააკაშვილმა.

„ძალიან მალე, ისტორიისთვის ძალიან მოკლე დროში, ჩვენ მოვესწრებით ახალ რუსეთს... რომელიც უარს იტყვის იმპერიულ ფანტაზიებზე, რუსეთს, რომელიც დაიწყებს დემოკრატიული სახელმწიფოს შენებას, იმ რუსეთთან ჩვენ მართლა დავალაგებთ ურთიერთობას“, – განაცხადა მან.

მისი თქმით, ძალიან მოკლე დროში აფხაზეთი და სამხრეთ ოსეთი განთავისუფლდება რუსული ოკუპაციისგან.