აქტუალური
მამუკა კაციტაძე: „საგარეო უწყება მოქალაქეებს ბარიერს უქმნის“
თბილისი, 8 აგვისტო, საქინფორმი. მამუკა კაციტაძე აცხადებს, რომ ამომრჩეველთა სიების გადამოწმების უზრუნველყოფის კომისიის კომპეტენციაში მინისტრისათვის საკონსულო აღრიცხვის წესის შეცვლის შესახებ რეკომენდაციის მიცემა არ შედის, შესაბამისად, კომისიას აღნიშნულზე არანაირი მითითება არ გაუცია.
თუმცა კაციტაძე მიიჩნევს, რომ, თუ უცხოეთში მცხოვრებ საქართველოს მოქალაქეს არჩევნებში აქტიური წესით მონაწილეობის მიღების სურვილი აქვს, მას სახელმწიფო ბარიერს არ უნდა უქმნიდეს.
„გაურკვეველია, როცა ევროკავშირის წევრი ქვეყნის მოქალაქეს, რომელიც საქართველოს მოქალაქე არ არის, სახელმწიფო პასიურ და აქტიურ საარჩევნო უფლებას აძლევს, ხოლო საქართველოს მოქალაქეს ბარიერებს უქმნის. ეს საქართველოს ხელისუფლების პოლიტიკის არასწორი და მახინჯი გამოხატულებაა“, – აცხადებს კაციტაძე.
აღსანიშნავია, რომ ათენში საქართველოს მოქალაქეებმა საგარეო საქმეთა მინისტრ გრიგოლ ვაშაძის ეს ბრძანება გააპროტესტეს.
