თბილისი, 8 აგვისტო, საქინფორმი. ოპოზიციური კოალიცია „ქართული ოცნების“ ლიდერმა ბიძინა ივანიშვილმა იმ ჟურნალისტებს მოუწოდა, რომლებიც, მისი თქმით, ემსახურებიან იმ სიცრუეს, რომელსაც ნერგავს პრეზიდენტი სააკაშვილი, არ დაექვემდებარონ ძალადობას და დაბრუნდნენ საზოგადოებაში.

„ძალიან ცოტა დრო დარჩა, – განაცხადა ივანიშვილმა ფოთში მხარდამჭერებთან შეხვედრაზე. – ჩვენ აუცილებლად გავისტუმრებთ ამათ 1 ოქტომბერს, აუცილებლად მოვა ახალი ხელისუფლება, ძალიან ცოტა დრო დაგრჩათ თქვენ იმისათვის, რომ საზოგადოებას დაუმტკიცოთ, რომ თქვენ წინააღმდეგობას უწევთ ამ სიცრუეს და იმ სიცრუის მექანიზმს, რომელსაც ერთი კაცი ნერგავს“.

„ჩემი თხოვნა იქნება და საზოგადოების მოთხოვნა იქნება – და ეს მოთხოვნა სანამ მკვეთრად გაჟღერებულა – გთხოვდით, რომ როგორმე პოზიცია შეიცვალოთ, როგორმე გახდით უფრო ობიექტურები, გაუწიეთ წინააღმდეგობა, ნუ ექვემდებარებით ძალადობას. დრო დარჩა ძალიან ცოტა და ნუ მოხდება ის, რომ ჩვენ მოვალთ, გავიმარჯვებთ და თქვენ საზოგადოებაში წევრობა გაგიჭირდებათ, რამდენადაც საზოგადოება ძალიან გაღიზიანებულია ძალიან ბევრ ჟურნალისტზე, უნდა მოახერხოთ და დაბრუნდეთ საზოგადოებაში“.