სამართალი
„ბანკი ქართუ“ სახელმწიფო იძულებითი მმართველობისას შექმნილ პრობლემებზე
თბილისი, 30 ივლისი, საქინფორმი. როგორც „ბანკი ქართუს“ პრეზიდენტი ნოდარ ჯავახიშვილი აცხადებს, სახელმწიფო იძულებითი მმართველობის დროს გაფორმებული საკრედიტო გარიგებები ბანკის ლიკვიდობას პრობლემებს შეუქმნის, რასაც შესაძლოა, მისი ეროვნული ბანკის დროებითი ადმინისტრაციის მმართველობაში გადასვლა მოჰყვეს.
მან ამ საკრედიტო გარიგებებს „დანაშაულებრივი“ უწოდა, ვინაიდან, მისი მტკიცებით, სესხების გაცემის ხელშეკრულებები საბანკო პროცედურების დარღვევით გაფორმდა.
ჯავახიშვილმა განაცხადა, რომ ორშაბათს მიმართავს სასამართლოს ამ ხელშეკრულებების ბათილად ცნობის თაობაზე, თუმცა იქვე დასძინა, რომ დადებითი გადაწყვეტილების მოლოდინი არ აქვს, რადგან ეჭვობს, რომ ხელისუფლების მიზანია ბანკის არალიკვიდობის საფუძველზე დროებითი ადმინისტრაცია დანიშნოს ბანკის სამართავად.
„დროებითი მმართველების უპირველესი დანიშნულება უნდა ყოფილიყო, რომ ბანკი მაღალ მოგებაზე ემუშავებინა და ამ მოგებიდან გადახდილიყო ეს დაკისრებული ვალდებულება. სინამდვილეში კი აქ შემოსვლის დღიდანვე ახალმა მმართველობამ დაიწყო უმოკლეს დროში ბანკის დაძირვის ოპერაციები“, – განაცხადა ჯავახიშვილმა.
შეგახსენებთ: ოპოზიციური კოალიცია „ქართული ოცნების“ ლიდერ ბიძინა ივანიშვილთან დაკავშირებული „ბანკი ქართუ“ იძულებითი მმართველობის ქვეშ ორ კვირამდე პერიოდის განმავლობაში იმყოფებოდა, რა დროსაც მას სახელმწიფოს მიერ დანიშნული დროებითი მმართველი ვლადიმერ უგულავა ხელმძღვანელობდა, რათა უზრუნველეყო სახელმწიფო ბიუჯეტის სასარგებლოდ იმ ჯარიმის დაფარვა, რომელიც ივანიშვილს პარტიების შესახებ კანონის დარღვევის მოტივით ივნისში დაეკისრა. ივანიშვილმა 80 მლნ ლარის ჯარიმა სახელმწიფო ბიუჯეტში გადარიცხა იმ მიზნით, რომ ხელისუფლებამ ეს თანხები სტიქიით დაზარალებულ მოსახლეობას მოახმაროს. ამ გადაწყვეტილების შემდეგ „ბანკ ქართუში“ სასამართლომ სახელმწიფო იძულებითი მართვის რეჟიმი შეწყვიტა და ბანკს სათავეში კვლავ ნოდარ ჯავახიშვილი ჩაუდგა.
