თბილისი, 30 ივლისი, საქინფორმი. იუსტიციის სამინისტროს საჯარო რეესტრის ეროვნულმა სააგენტომ გაზეთ „საჯარო რეესტრის“ დანართი „დაისვენე საქართველოში“ უკვე რუსულ ენაზეც გამოსცა. დანართი სახელწოდებით „Отдохни в Грузии“ კვირაში ერთხელ პარასკეობით გამოდის და განკუთვნილია საქართველოში პოსტსაბჭოთა ქვეყნებიდან შემოსული ტურისტებისთვის.

გაზეთში განთავსებულია ინფორმაცია თბილისსა და საქართველოს სხვა ქალაქებსა და რაიონებში, ტურისტულად აქტიურ ზონებში მდებარე ბინების, სახლების, საოჯახო ტიპის სასტუმროების გაქირავებისა და მომსახურების შესახებ. „Отдохни в Грузии“ საუკეთესო საშუალებაა საქართველოში სასწავლებლად, საქმიანი თუ ტურისტული ვიზიტით მყოფი რუსულენოვანი მოქალაქებისთვის.

ცნობისათვის: სულ ცოტა ხნის წინ სააგენტომ და „24 საათმა“ მომხმარებელს ერთობლივი პროექტი – გაზეთი „საჯარო რეესტრი“ შესთავაზა. გაზეთის ყოველ ნომერში 5000-ზე მეტი განცხადებაა განთავსებული უძრავი ქონების, ავტომობილების ყიდვა-გაყიდვის, გაქირავების, აუქციონების, ვაკანსიების შესახებ.

გაზეთს დართული აქვს ინგლისურენოვანი ჩანართიც. უცხოენოვანი ჩანართების მეშვეობით, უცხოელი მოქალაქე მარტივად და კომფორტულად, მათთვის გასაგებ ენაზე შეძლებს მოიძიოს საოჯახო ტიპის სასტუმროები, ბინები და სხვა გასაქირავებელი უძრავი ქონება.

გაზეთის ინგლისური და რუსულენოვანი ჩანართი ხელს შეუწყობს ქვეყანაში მცირე ბიზნესის განვითარებასაც. იმ სეგმენტს, რომელსაც რეკლამირების ფინანსური საშუალებები შეზღუდული აქვს, შეძლებს უფასოდ განათავსონ თავიანთი გასაქირავებელი უძრავი ქონების შესახებ დეტალური ინფორმაცია და პირდაპირი კავშირი დაამყაროს მომხმარებელთან, რაც უცხოელი კლიენტების მოზიდვის ერთ-ერთი საუკეთესო საშუალება იქნება. მოქალაქის სურვილის შემთხვევაში, საჯარო რეესტრი უსასყიდლოდ უზრუნველყოფს განცხადების ტექსტის ინგლისურ ენაზე თარგმნას.