თბილისი, 30 ივლისი, საქინფორმი. როგორც „საერთაშორისო გამჭვირვალობა – საქართველომ“ განაცხადა, საქართველოს საელჩო ვაშინგტონში საქართველოს საკითხებით დაინტერესებულ გავლენიან ამერიკელ ექსპერტებსა და მკვლევარებს ელექტრონულ წერილებს უგზავნის, რითაც ბიძინა ივანიშვილისა და ოპოზიციური კოალიცია „ქართული ოცნების“ დისკრედიტაციას ცდილობს.

„მიგვაჩნია, რომ მსგავსი ქმედებები წარმოადგენს მმართველი პოლიტიკური პარტიის სასარგებლოდ სახელმწიფო რესურსების გამოყენებას, – განაცხადა უფლებადამცველმა ორგანიზაციამ. – ერთი პარტიის ლობისტური მიზნებისთვის და შიდაპოლიტიკური მოწინააღმდეგეების სახელის გატეხვის მიზნით დიპლომატიური სამსახურის გამოყენება დაუშვებელია და ასეთი ნაბიჯები დემოკრატიული ქვეყნების პრაქტიკას სრულად ეწინააღმდეგება“.

„საერთაშორისო გამჭვირვალობა – საქართველომ“ ორი ელექტრონული წერილი გაასაჯაროვა, რომელიც, ორგანიზაციის თქმით, ამ წერილების ერთ-ერთმა ადრესატმა მიაწოდა. ერთი მათგანი, რომელიც, სავარაუდოდ, აშშ-ში საქართველოს საელჩოს მეორე მდივნის – ხათუნა ოყროშიძის – მიერაა გაგზავნილი,  შეიცავს გაზეთ „ასავალ-დასავალის“ სტატიის თარგმანს, რომელშიც საქართველოში აშშ-ის ყოფილი ელჩი ჯონ ბასი უარყოფითად არის მოხსენიებული და რომელშიც საქართველოს საელჩოს თანამშრომელი წერს, რომ „ასავალ-დასავალი“ ბიძინა ივანიშვილის საყვარელი გამოცემაა და ეს გაზეთი ქსენოფობიური შინაარსის სტატიებით გამოირჩევა. მეორე ელექტრონული წერილი კი, რომელიც საელჩოს იმავე თანამშრომლის მიერაა გაგზავნილი, შეიცავს ამონარიდებს სხვადასხვა ქართული გაზეთიდან, რომლებშიც პოლიტიკური პარტია „მრეწველობა გადაარჩენს საქართველოს“ წარმომადგენლების პოზიციებია მოყვანილი. საელჩოს თანამშრომელი იქვე აღნიშნავს, რომ ეს პოლიტიკური პარტია კოალიცია „ქართული ოცნების“ წევრი გახდა და იგი გამოირჩევა ანტიდასავლური და საქართველოს ნატოში გაწევრების საწინააღმდეგო პოზიციით, ასევე, სურს ქვეყანაში ბელარუსის მსგავსი ჩაკეტილი ეკონომიკის შექმნა, რომლის მთავარი პარტნიორიც რუსეთი იქნება.

„საერთაშორისო გამჭვირვალობა – საქართველო“ აცხადებს, რომ გარდა ადმინისტრაციული რესურსების ბოროტად გამოყენებისა, ეს ქმედება არის დიპლომატიური სამსახურის შესახებ საქართველოს კანონის დარღვევა, რომლის თანახმადაც, დიპლომატიურ სამსახურში მოღვაწეობის პერიოდში დიპლომატიური თანამდებობის პირი პოლიტიკურად ნეიტრალურია; იგივე კანონი უკრძალავს დიპლომატს პოლიტიკაში ჩართულობას და მას არა აქვს უფლება, „ეწეოდეს საქმიანობას/პროპაგანდას ნებისმიერი პოლიტიკური პარტიის, ორგანიზაციის, გაერთიანების სასარგებლოდ ან წინააღმდეგ“.

„საერთაშორისო გამჭვირვალობა – საქართველომ“ მოუწოდა საგარეო საქმეთა სამინისტროს, გამოიკვლიოს აღნიშნული ფაქტი, მიიღოს შესაბამისი ზომები და არ დაუშვას დიპლომატიური სამსახურის პოლიტიზება.