თბილისი, 27 ივლისი, საქინფორმი. უკრაინაში ხორბლის ფასმა წლის მაქსიმუმს მიაღწია და ტონაზე 238 დოლარი შეადგინა. „კომერსანტ უკრაინის“ ინფორმაციით, ერთ თვეში ფასებმა 13,5%-ით მოიმატა. 17,4 პროცენტით ავარდა მისი საექსპორტო ფასიც და 310 დოლარი შეადგინა. ამაზე ძვირი ხორბალი მხოლოდ 2011 წლის ივლისში იყო, როდესაც მისმა ფასმა ტონაზე 248 დოლარი შეადგინა.

რაც შეეხება სიმინდის ღირებულებას, ის 8,4%-ით, ტონაზე 201 დოლარამდე გაიზარდა, საექსპორტო ფასმა კი, 14%-ით აიწია და 278 დოლარი შეადგინა.

გავრცელებული ინფორმაციით, რუსეთში ხორბლის ფასმა ისტორიულ მაქსიმუმს მიაღწია და ივნისის ბოლოს შავი ზღვის პორტებში რუსული ხორბლის ფასებმა ტონაზე 9 ათასი რუბლი შეადგინა. ფასების ზრდის მიუხედავად, ტრეიდერები კონტრაქტების გაფორმებას არ ჩქარობენ, რადგან ელოდებიან მარცვლეულის კიდევ გაძვირებას ელოდებიან.

აშშ-ში დაწყებული გვალვის გამო ხორბლის, სიმინდისა და სოიოს მსოფლიო ფასები 2008 წლის შემდგომი პერიოდის რეკორდულ ნიშნულს გაუტოლდა, გვალვისგან ლათინური ამერიკის ქვეყნებიც დაზარალდა.