თბილისი, 20 ივლისი, საქინფორმი. სახელმწიფო ვერ ჩაერევა მაუწყებელთა სავალდებულო ტრანზიტის „must carry“-ს პრინციპის წინასაარჩევნო პერიოდის შემდეგ გახანგრძლივების საკითხში. ეს განცხადება პარლამენტის თავმჯდომარე დავით ბაქრაძემ გააკეთა საქართველოში აკრედიტებული ელჩების მუშა ჯგუფის მოწოდების საპასუხოდ.

როგორც უკვე იუწყებოდა საქინფორმი, ელჩების მუშა ჯგუფი მიესალმა „must carry“-თან დაკავშირებით კანონმდებლობაში დანერგილ უაღრესად პოზიტიურ ინიციატივას ქართული მოსახლეობის დიდი ნაწილის უფრო მრავალფეროვანი სახის საინფორმაციო წყაროებით უზრუნველყოფის კუთხით.

ეს პრინციპი, კანონის თანახმად, რომელსაც პრეზიდენტმა რამდენიმე დღის წინ მოაწერა ხელი, წინასაარჩევნო პერიოდში – არჩევნების ოფიციალურად დანიშვნის დღიდან არჩევნების დღემდე – იმოქმედებს.

„ჩვენ, აგრეთვე, მოვუწოდებთ ხელისუფლებას, კვლავაც განიხილოს „must carry“-სა და „must-offer“-ის  ვალდებულების გავრცელების შესაძლებლობა არჩევნების დღის შემდგომი პერიოდისათვის“, – ნათქვამია ელჩების განცხადებაში.

ამ მოწოდების საპასუხოდ დავით ბაქრაძემ იგივე პოზიცია დააფიქსირა, რის შესახებაც მან ივნისის ბოლოს კანონის მიღებისას ისაუბრა.

„სახელმწიფო მუდმივად ვერ ჩაერევა კერძო ბიზნესის საკითხში, – განაცხადა მან. –  ჩვენ გვაქვს პერიოდი, როდესაც სახელმწიფო შესაძლებლად მიიჩნევს, რომ გამომდინარე დემოკრატიის ინტერესიდან ჩაერთოს – ეს არის წინასაარჩევნო პერიოდი, ამიტომ წინასაარჩევნო პერიოდში მათ (საკაბელო ოპერატორებსა და ტელევიზიებს, – საქინფრომი) აქვთ ვალდებულება, რომ ეს (სავალდებულო ტრანზიტი, – საქინფორმი) გააკეთონ. რაც შეეხება ნებისმიერ დანარჩენ პერიოდს, ეს არის ნებაყოფლობითი“.

„და ისევ ვიმეორებ: ჩვენ ხელს შევუწყობთ და წავახალისებთ ყველა საკაბელო მაუწყებელს და ყველა სატელევიზიო არხს, რომელიც გააგრძელებს იმ თანამშრომლობას, რომელიც ჩამოყალიბდება ამ წინასაარჩევნო პერიოდის განმავლობაში“, – აღნიშნა პარლამენტის თავმჯდომარემ.